“Kryeministri i Republikës së Kosovës nuk ka qenë me agjende shtetërore, por private dhe familjare. Institucioni nuk bartë asnjë kosto materiale”, thuhej në përgjigjen e shkurtër të Zyrës për komunikim publik të kryeministrit.
Pas deklarimit të kryeministrit Haradinaj se kostoja e pushimeve të tij në Saint Moritz ka kushtuar vetëm shtatë mijë euro, Insajderi ka kërkuar nga Zyra e Kryeministrit dëshmi për pushimet luksoze të Ramush Haradinajt me familje.
Insajderi ka kërkuar përmes e-mailit nga Zyra e Kryeministrit publikimin e faturave të udhëtimit në Zvicër dhe akomodimit në hotelin “Carlton” – njërin nga hotelet më të shtrenjta në botë.
Mirëpo, gazeta nuk ka marrë përgjigje nga Zyra për Komunikim Publik e kryeministrit. Ata kanë preferuar të heshtin dhe të mos publikojnë dëshmitë e pushimit të Haradinajt.
Qendra e skijimit në Saint Moritz është një nga më të shtrenjtat në botë. Hoteli “Carlton” i ndërtuar në stilin rus në alpet zvicerane përballë një liqeni, është në mesin e pesë hoteleve më të mira dhe më të shtrenjta në këtë qendër.
Saint Moritz është fshat turistik në juglindje të Zvicrës, pjesë e Kantonit të Grisonsit. Ky fshat shtrihet në vargmalet Albula, me një lartësi prej 1 mijë e 800 metrave mbi nivelin e detit. Saint Moritz ka një popullsi prej rreth 5 mijë banorësh.
Fshati njihet si qendër e turizmit dimëror në Zvicër. Në Saint Moritz janë zhvilluar dy herë Lojërat Olimpike dimërore: në vitet 1928 dhe 1948.
Ndërkaq, hoteli “Carlton” është ndërtuar më 1913. Ka 60 suita me pamje nga liqeni. Lidhur me hotelin ekziston edhe një legjendë. Thuhet se është ndërtuar për të shërbyer si rezidencë e Carit të Rusisë, Nikolasit të Dytë.