Kryeministri në detyrë, Albin Kurti, sot ka vizituar Klinën për të parë se si po përballet kjo komunë në luftën ndaj koronavirusit.
Bashkë me të ishin edhe ministrja e Arsitmit, Hykmete Bajrami, ai i Shëndetësisë Arben Vitia dhe dhe e Administrimit dhe Pushtetit Lokal, Emilja Rexhepi, njofton Klan Kosova.
Qeveritarët u pritën nga kryetari i komunës Zenun Elezaj, i cili ka falënderuar kryeministrin për vizitën dhe bashkëpunimin ndërmjet institucioneve gjatë kësaj kohe të përhapjes së pandemisë.
Elezaj informoi kryeministrin për masat e ndërmarra nga komuna kundër përhapjes së virusit dhe përgatitjet që janë bërë nga Shtabi i Emergjencës dhe në veçanti për punën nga Qendra Kryesore e Mjekësisë Familjare, Policia dhe Qendra për Punë Sociale.
Ai tha se Klina megjithëse është komuna e parë ku është konfirmuar pacienti zero, duke ju falënderuar masave të ndërmarra dhe kujdesit dhe vetëdisiplinës që po tregojnë qytetarët gjatë kësaj kohë, ka ndikuar shumë pozitivisht në mospërhapjen e virusit në Klinë.
Ndërsa, Kurti falënderoi kryetarin për pritjen dhe e përgëzoi për masat e ndërmarra. Ai gjithashtu bëri thirrje të respektohen këshillat e ekspertëve shëndetësorë, që të mbahet distanca dhe higjiena.
Megjithatë, Elezaj tregoi edhe për sfidat me të cilat po përballet komuna dhe qytetarët, si problemi i furnizimit me ujë të pijshëm, por edhe nevojën e përfshirjes të punëtorëve të KRU “Ambienti” në Pakon Emergjente.