Kurti pas takimit me ministren gjermane: Dialogu duhet të jetë parimor me një marrëveshje ligjërisht të obligueshme

Prishtinë | 05 Maj 2022 | 18:18 | Nga Ekonomia Online Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Kryeministri i Kosovës, Albin Kurti dhe ministrja e Mbrojtjes së Republikës Federale të Gjermanisë, Christine Lambrecht, kanë diskutuar për vazhdimin e mbështetjes së Kosovës drejtë anëtarësimit të Kosovës në organizata të ndryshme ndërkombëtare dhe për liberalizim të vizave, raporton Ekonomia Online.

Këtë e ka bërë të ditur shefi i Qeverisë në një konferencë për medie së bashku me ministren Lambrecht, me ç’rast ka thënë se ndihma e Gjermanisë në shtetndërtimin e Kosovës është e madhe.

Ai ka thënë se në këtë takim është biseduar edhe për dialogun me Serbinë, duke vënë në theks njohjen reciproke për të sjellë normalizim të marrëdhënieve.

“Vizitat e ndërsjellta rikonfirmojnë marrëdhëniet e shkëlqyeshme ndërmjet dy vendeve tona dhe janë mundësi e thellimit të miqësisë. Gjermania jo vetëm që është aleat i joni por edhe shtëpia e mijërave shqiptarë. Gjermania ka dhënë kontribut të çmuar për çlirimin, pavarësimin e shtetit të Kosovës dhe u ka hapur dyert mijëra shqiptarëve. Biseduam edhe për aplikimin në shumë organizata ndërkombëtare dhe për liberalizimin e vizave”.

Duke folur për dialogun me Serbinë, Kurti tha se në qendër të marrëveshjes duhet të jetë njohja reciproke.

“Ky dialog duhet të rezultojë me marrëveshje, por kjo marrëveshje duhet të ketë në qendër njohjen reciproke, do të ketë edhe elemente tjera, por të cilat nuk mund të kenë kuptimin pa këtë qendër që është njohja reciproke”, tha Kurti.

Fjala e kryeministrit Kurti në konferencën për media, pas takimit me ministren e Mbrojtjes së Gjermanisë, Christine Lambrecht:

E nderuar ministre e Mbrojtjes e Gjermanisë, znj. Christine Lambrecht,

Të nderuar përfaqësues të mediave,

Të dashur qytetarë,

Dje unë qëndrova për vizitë në Berlin, ndërsa sot në Prishtinë jemi këtu së bashku me Ministren e Mbrojtjes së shtetit tonë mik, Gjermanisë. Mirë se erdhe zonja Lambrecht dhe faleminderit për vizitën.

Gjithashtu, më lejoni të ju shpreh falënderimin tim për pritjen e ngrohtë që m’u bë dje nga shteti gjerman dhe bisedat e frytshme e miqësore që patëm. Vizitat e ndërsjella dhe të shpeshta të nivelit të lartë shtetëror i rikonfirmojnë marrëdhëniet e shkëlqyeshme mes dy vendeve tona dhe janë mundësi shumë e mirë për thellimin e mëtejmë të miqësisë dhe të bashkëpunimit.

Gjermania jo vetëm që është aleati ynë me të cilin na lidhin interesat e përbashkëta, por është edhe shtëpia e më shumë se 400.000 bashkatdhetarëve tanë. Ky fakt e bën edhe më të veçantë lidhjen mes dy popujve dhe dy vendeve tona.

Republika Federale e Gjermanisë ka dhënë kontribut të çmuar për çlirimin, pavarësimin dhe shtetndërtimin e Kosovës dhe ne i jemi shumë mirënjohës. Ua ka hapur dyert dhe ju ka ofruar strehim refugjatëve shqiptarë në vitet e ‘90-ta dhe ka shkolluar gjenerata të tëra shqiptarësh në shkolla dhe universitete.

Me Ministren e Mbrojtjes biseduam edhe për mbështetjen që mora nga Kancelari Scholz dhe Ministrja e Jashtme, Baerbock, për aspiratat tona për anëtarësim në organizatat ndërkombëtare si Këshilli i Evropës, ku planifikojmë që të aplikojmë së shpejti, si dhe për liberalizimin e vizave për qytetarët e Kosovës.  

Siguria dhe ruajtja e paqes kudo dhe ngado, është temë e pashmangshme e çdo bisede këto javët e fundit. Edhe në takimin me ministren Lambrecht biseduam pikërisht për shqetësimet rreth sigurisë në rajon dhe Evropë, pas invazionit e agresionit të Rusisë kundër Ukrainës.

Duhet të flasim sa më shpesh dhe hapur për aspiratat tona në fushën e sigurisë, si për shembull anëtarësimi ynë në mekanizma të sigurisë së përbashkët.


Për sigurinë tonë dhe të vendit tonë ka 23 vjet që kujdesen forcat gjermane, të cilat shërbejnë në misionin më të madh paqeruajtës të NATO-s, në Kosovë.

Republika e Kosovës e ka dënuar ashpër agresionin rus që në ditën e parë. Jemi solidarizuar me popullin e Ukrainës, duke u rreshtuar përkrah Bashkimit Evropian dhe Shteteve të Bashkuara të Amerikës në vendosjen e sanksioneve kundër Rusisë. Kemi ofruar strehim dhe kushte për punë për 20 gazetarë të Ukrainës dhe mundësinë që të strehojmë deri në 5.000 refugjatë. Vetëm një botë e bashkuar dhe demokratike mund ta ndalë një diktator sikurse lideri despotik i Kremlinit.

Diskutuam se si Gjermania është ndër partnerët tanë që kanë ndihmuar me trajnime e pajisje ndërtimin dhe zhvillimin e Forcës së Sigurisë së Kosovës. Si dhe që ky bashkëpunim vazhdon ende dhe ne e mirëpresim përkrahjen e mëtejme.

Ministres Lambrecht i kërkova mbështetjen lidhur me qëllimin e Kosovës për përgatitje për aplikim dhe pranim në Programin e Partneritetit për Paqe, si dhe në organizata tjera, rajonale dhe ndërkombëtare, specifikisht në Kartën e Adriatikut në A5.

Me ministren folëm për progresin në këtë një vit të qeverisjes dhe përpjekjet tona për të fuqizuar sundimin e ligjit, për luftimin e kontrabandës, krimit dhe të korrupsionit. U pajtuam që krimi dhe korrupsioni janë ndër faktorët kryesorë të rrezikimit të sigurisë kombëtare të një shteti. Prandaj, duhet t’u kundërvihemi pa kompromise. Biseduam po ashtu edhe për procesin e bisedimeve me Serbinë dhe ritheksova se dialogu duhet të jetë parimor për të sjellë normalizim të plotë të marrëdhënieve me një marrëveshje ligjërisht të obligueshme e cila e ka njohjen reciproke në qendër.

Lexo më shumë:

Të ngjashme