Kurti për marrëveshjen e energjisë: Po bëjmë më të mirën me atë çfarë kemi trashëguar

Prishtinë | 22 Qer 2022 | 11:41 | Nga Leonora Kolukaj Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Kryeministri Albin Kurti ka thënë se Qeveria e tij po mundohet të bëjë më të mirë në raport me atë që ka trashëguar, kur ka folur në mbledhjen e kabinetit, një ditë pasi Kosova e Serbia u zotuan për implementim të marrëveshjes për energjinë elektrike në katër komunat në veri të Kosovës.

Në Bruksel, Kosova dhe Serbia të martën miratuan udhërrëfyesin për implementimin e marrëveshjeve të energjisë në veri të Kosovës. Dy shtetet miratuan udhërrëfyesin për zbatimin e marrëveshjes për energjinë në veri. Marrëveshje ishte arritur qysh më 2013, por s’ishte zbatuar. Bëhet fjalë për energjinë që shpenzojnë serbët në veri e nuk e paguajnë. Me marrëveshje parashihet që Zyra e Rregullatorit të Energjisë të lëshojë licencë furnizimi te “Elektroseveri”, i cili do të merret me operimin në katër komunat në veri.

Në mbledhjen e së mërkurës, Kurti ka thënë se me marrëveshje katër komunat në veri do të kalojnë në një rend të faturimit të pagesave.

“Kemi trashëguar shumë gjëra që nuk kemi dashur. Po bëjmë më të mirën me atë çfarë kemi trashëguar. Siç jemi zotuar, pas 20 vitesh po e ndalim një padrejtësi dhe gjakderdhje financiare në atë pjesë të vendit dhe po përfundojmë një problematikë në sektorin e energjisë. Ky sektor është prioritar për Qeverinë e Republikës së Kosovës, pasi prek çdo aspekt të jetës së qytetarëve tanë”, ka thënë Kurti.

Ai ka thënë se pas më shumë se 20 vitesh, buxhetit të Kosovës do t’i kursehen dhjetëra milionë euro në vit, të paguara më herët për mbulimin e kostove energjetike të veriut të vendit.

Adresimi i kryeministrit Albin Kurti në mbledhjen e 84-të të Qeverisë

Të nderuar anëtarë të kabinetit qeveritar,
Zëvendëskryeministre Rexhepi, ministra e zëvendësministra,

Mirë se e gjejmë njëri-tjetrin në mbledhjen e 84-të të Qeverisë së Republikës së Kosovës.

Të nderuar qytetarë të Republikës së Kosovës,

Pas më shumë se 20 vitesh, buxhetit të Republikës së Kosovës do t’i kursehen dhjetëra milionë euro në vit, të paguara më herët për mbulimin e kostove energjetike të veriut të vendit.

Katër komunat në veriun e Kosovës, do të kalojnë në një rend të rregullt të furnizimit, faturimit dhe inkasimit të pagesave për konsumin e energjisë elektrike, në bazë të sistemit rregullativ dhe ligjor të Republikës së Kosovës.

Udhërrëfyesi i dakorduar në takimin e djeshëm në Bruksel do ta mundësojë këtë. Bashkimi Evropian do ta mbikëqyrë zbatimin e këtij dakordimi. E me zbatimin e këtij udhërrëfyesi, do të mundësohet përfundimi definitiv i një problematike të trashëguar, tё pagesёs sё energjisё nё katër komunat nё veri tё vendit.

Kemi trashëguar shumë gjëra që nuk kemi dashur. Po bëjmë më të mirën me atë çfarë kemi trashëguar. Siç jemi zotuar, pas 20 vitesh po e ndalim një padrejtësi dhe gjakderdhje financiare në atë pjesë të vendit dhe po përfundojmë një problematikë në sektorin e energjisë.

Ky sektor është prioritar për Qeverinë e Republikës së Kosovës, pasi prekë çdo aspekt të jetës së qytetarëve tanë. 

Për këtë arsye ne kemi marrë përsipër detyrën e rëndësishme të zhvillimit të një Strategjie Kombëtare të Energjisë, në mënyrë që sektori ynë i energjisë të niset për një tranzicion të drejtë energjetik – tranzicion i cili do të diversifikojë miksin e energjisë, do të ruajë sigurinë e furnizimit, do të promovojë energjinë e pastër dhe bashkëpunimin rajonal, në radhë të parë me Shqipërinë, por edhe me vendet e tjera.

Strategjia e Energjisë 2022-2031, po finalizohet përmes proceseve demokratike, transparente e gjithëpërfshirëse.

Ministrja jonë e Ekonomisë, znj. Artane Rizvanolli, po vazhdon konsultimet publike anëmbanë Kosovës për draftin e Strategjisë së Energjisë, si dhe shqyrtimet e vazhdueshme me profesionistë dhe ekspertë të shumtë. Andaj shpresoj që sa më shumë qytetarë do të bashkohen në këto diskutime, që të kemi një strategji e cila u shërben më së miri të gjithëve, e një sektor të energjisë që furnizon e trajton në mënyrë të barabartë të gjithë qytetarët. 

E trajtimin e barabartë të të gjithë qytetarëve të Republikës sonë, në raport me konsumin dhe pagesën e energjisë elektrike do ta mundësojë zbatimi i udhërrëfyesit të dakorduar dje.

Qeveria e Republikës së Kosovës është e përkushtuar që transformimin e sektorit të energjisë ta bëjë duke siguruar drejtësi sociale.

Ne do të vazhdojmë punën për një të ardhme energjetike të Kosovës më të ndritshme, më të qëndrueshme, e në shërbim të zhvillimit të shtetit tonë.

Ju faleminderit e tash po kalojmë në pikat e shumta të rendit të ditës të parapara për sot.

Lexo më shumë:

Të ngjashme