Kurti: Thaçi s’përmbushi premtimin për korrigjim kufiri me Malin e Zi, nisi premtimin e ri me Serbinë

Prishtinë | 16 Shk 2019 | 11:35 | Nga Ekonomia Online

Kryetari i Lëvizjes Vetëvendosje, Albin Kurti, ka kujtuar se sot janë mbushur fiks një vit nga marrëveshja Thaçi-Vujanoviq.

“Thanë se me atë nënshkrim e garantojnë korrigjimin e kufirit me Malin e Zi dhe do t’i kthejnë ato 8.200 hektarë. Kësisoj i mashtruan deputetët që ratifikuan demarkacionin më 21 mars 2018”, ka shkruar Kurti në Facebook.

Kurti, tutje ka thënë se në vend të përmbushjes së premtimit, i njëjti njeri nisi me premtimin për korrigjim kufiri edhe me Serbinë.

“’Korrigjimet’ e njeriut më të gabuar që ka Kosova janë veçse gabime të reja. Një qeveri e re e Kosovës duhet ta mundësojë korrigjimin e pasurisë së tij”, ka thënë tutje.

Më 16 shkurt të 2018-s, Presidenti i Kosovës, Hashim Thaçi, në një konferencë për media ka njoftuar se bashkërisht dhe në të njëjtën kohë me presidentin e Malit të Zi, Filip Vujanoviq, kanë dalë me një Deklaratë për ratifikimin e marrëveshjes së demarkacionit ndërmjet Kosovës dhe Malit të Zi.

Fjalë Kryesore:

Të ngjashme