Në Bruksel janë zhvilluar sonte takime joformale të ndërmjetësuesve të SHBA-së dhe BE-së më kryeministrin Albin Kurti dhe presidentin e Serbisë Aleksandar Vuçiq.

Pas takimeve, përfaqësuesi Evropian për Dialogun Kosovë-Serbi, Miroslav Lajçak, ka publikuar fotografi me dy liderët, që do të takohen nesër kokë më kokë.

Ai ka thënë se po bëhen përgatitjet e fundit për nesër, për takimin mes Kurtit dhe Vuçiqit.

“Në prag të dialogut të nivelit të lartë në Bruksel, pata takime me kryeministrin e Kosovës Albin Kurti dhe presidentin e Serbisë Aleksandar Vuçiq, për t’u përgatitur për diskutimet e nesërme”, ka shkruar Lajçak.

Ndërsa në një prononcim për gazetarët, pas përfundimit të takimeve, Lajçak ka thënë se takimet e veçanta me Kurtin dhe Aleksandër Vuçiqin janë tashmë normale dhe përgatitore.

“I kam takuar Kurtin dhe Vuçiqin ndaras, për të diskutuar paraprakisht dhe për t’i përgatitur për takimin e nesërm. Presim marrëveshje nesër, jo finale natyrisht, do të ishte shumë naive të shpresonim atë”, ka thënë Lajçak për Kanal10.

I pyetur nëse do t’i kërkohet Kurtit që të shtyjë vendimin e Qeverisë së Kosovës për targat, Lajçak i është drejtuar gazetarit duke buzëqeshur me fjalët “po bën shumë pyetje”.

Takime me Kurtin e Vuçiq ka zhvilluar edhe i Dërguari i Amerikës për Ballkanin, Gabriel Escobar, i cili po qëndron në Bruksel. Escobar ka thënë se Asociacioni i Komunave serbe, një çështje që pritet të diskutohet me prioritet nesër, duhet të krijohet duke respektuar Kushtetutën dhe ligjet e Kosovës.