Profesori Blerim Latifi ka folur për veprimtarin politike të Jusuf Gërvallës, veprimtarit të çështjes kombëtare.

Latifi tha se Gërvalla ishte një enverist i bindur, duke thënë që letrat që ia dërgonte ish-diktatorit Enver Hoxha e dëshmojnë këtë, raporton Gazeta Express.

“Kush e njeh veprimtarinë politike të Jusuf Gërvallës dhe kush i ka lexuar tekstet e tij politike, e kupton menjëherë se ai ideologjikisht ishte një enverist i bindur.Letrat që ia dërgonte  Enver Hoxhës e dëshmojnë katërcipërisht këtë”, shkroi Latifi në Facebook.

Po ashtu ai tha se bindjet e Jusuf Gërvallës dhe të LDK-së nuk përputhen në asnjë pikëpamje.

“Nëse Jusuf Gërvalla do t’i mbijetonte atentatit të UDB-së, ai do të ishte, në mos kryetar, gjithqysh njëra ndër figurat kryesore të LPK-së dhe më pas edhe anëtar i Shtabit të Përgjithshëm të UÇK-së. Besimet politike të Jusuf Gërvallës dhe ato të LDK-së nuk përputhen në asnjë pikëpamje, për të mos thënë se e përjashtojnë njëra-tjetrën”.