Lekaj: Haradinaj ka të drejtë ta ngre zërin

Prishtinë | 24 Gus 2018 | 11:26 | Nga

Ministri Pal Lekaj e ka mbrojtur shefin e tij në qeveri e në parti, Ramush Haradinajn, duke thënë se ai ka të drejt ta ngritë zërin kur bëhet fjalë për mbrojtjen e vlerave të luftës, pasi edhe vetë ka dhënë shumë në luftën e fundit.

Lekaj me një status në Facebook argumenton në favor të Haradinajt, pasi ky i fundit në disa intervista i ka dhënë epitetet ofenduese, Elez Blakajt, ish-prokurorit që po hetonte listat e veteranëve, por që la lëndën dhe u largua për në Shtetet e Bashkuara të Amerikës, duke thënë më pas se ishte kërcënuar disa herë për punën e tij.

“Ramush Haradinaj, si njëri nga komandantët me të shquar të luftës së UÇK-së, natyrshëm e ka të drejtën që të ngritë zërin, në mbrojtje të vlerave të bashkluftëtarëve të tij”, ka shkruar Lekaj.

“Kryeministri sakrifikoi shumë për këtë vend. Me vete bartë plagët e luftës dhe të dhembjes së humbjes së familjarëve për tokën e shenjtë të Kosovës. Prandaj askush më shumë se ai nuk do të dëshironte që meritorët, tashmë 20 vjet pas luftës, të marrin trajtim të dinjitetshëm institucional”.

“Debati i ditëve të fundit për listat e veteranëve dhe fryrjen apo jo të tyre, më së paku i shkon në favor shoqërisë tonë”.

“Kosova, siç e dimë të gjithë, gjendet në momentet më vendimtare për të dhe ky debat i orkestruar për të keq, nuk do të duhej të lejohet që të përhapet. Nga kjo situatë nuk do të përfitojë askush, por do të humbë më së shumti vendi ynë”.

Fjalë Kryesore:

Të ngjashme