Lista Serbe mbron Vuçiqin: Petroviq shiti tokën dhe popullin

Prishtinë | 13 Mar 2019 | 18:18 | Nga Ekonomia Online

Lista Serbe reagoi sot ndaj një letre të hapur që kryetari i SLS-së, Sllobodan Petroviq i dërgoi presidentit serb Aleksandar Vuçiq, duke thënë se ai “shiti vendin dhe popullin në një kohë fatale dhe se në atë letër ai paraqiti një sasi të madhe gënjeshtrash”.

Në deklaratë thuhet se “Petroviq, partia e të cilit është fryt i blasfemisë natyrore të ambasadave perëndimore dhe Hashim Thaçit në shfaqjen artificiale të multietnicitetit në Kosovë, sulmoi Listën Serbe dhe Vuçiqin me shpresën se askush nuk do t’i përgjigjet atij dhe t’ia kujtojë atij se sa është i dëgjueshëm ndaj partive shqiptare dhe mentorëve të tij”.

Kryetari i Partisë së Pavarur Liberale Serbe (SLS), Sllobodan Petroviq, i është drejtuar me një letër të hapur presidentit të Serbisë Aleksandar Vuçiq, pas sulmeve publike që i kishte bërë ky i fundit lidhur me votimin e tij për ushtrinë e Kosovës, duke thënë se ditën kur është bërë votimi ai ka qenë në Paris dhe jo në Kuvend.

I pari i SLS, parti kjo e cila së fundi ka marrë drejtimin e Ministrisë së Bujqësisë, pas shkarkimit të Nenad Rikallos nga Lista Serbe, ka akuzuar Vuçiqin se po justifikon dështimet e Listës Serbe duke e sulmuar atë si kryetar të SLS, transmeton kp.

Ai ka demantuar pohimet e Vuçiqit se ka votuar pro platformës së Kuvendit të Kosovës për dialogun me Serbinë, duke thënë se ka abstenuar në seancë, gjë e cila është shumë lehtë për ta verifikuar.

Petroviq po ashtu hedh poshtë pretendimet e Vuçiqit se ka bërë kuorum në seancën e Kuvendit të Kosovës me rastin e miratimit të platformës, duke thënë se atë ditë kanë qenët të pranishëm deputetë të mjaftueshëm, të cilët edhe pa praninë e tij do ta bënin kuorumin.

Ndërsa, ka përsëritur se ministrja e re e Bujqësisë Diana Zhiviq nuk është organizatore e protestave “1 në 5 milionë” në Graçanicë, dhe se Vuçiq nuk është duke thënë të vërtetën.

Petroviq ka siguruar presidentin serb Vuçiq se sikur SLS të organizonte protesta në Graçanicë, do të merrnin pjesë mijëra njerëz dhe jo vetëm pesë-gjashtë sish.

Të ngjashme