Ministrja e Punëve të Jashtme dhe Diasporës e Republikës
së Kosovës, znj. Donika Gërvalla, ka pritur sot në takim ministren e Jashtme të
Suedisë, njëherësh kryesuese e radhës së OSBE-së, znj.Ann Linde.
Ky takim u zhvillua në kuadër të angazhimit të Suedisë si kryesuese e OSBE-së.
Homologet patën rastin të shkëmbejnë mendime edhe për çështje bilaterale mes
Kosovës dhe Suedisë.
Palët diskutuan për prioritetet e Suedisë në kuadër të kryesimit të OSBE-së,
duke vendosur theksin në konceptin gjithëpërfshirës dhe qasjen
shumë-dimensionale që ndërthur çështje që lidhen me sigurinë politike,
ekonomike, të drejtat e njeriut dhe demokracinë.
Duke folur për agjendën e grave, kryediplomatja Linde vlerësoi se Kosova është
shembull i mirë i përfaqësimit të grave në pozita udhëheqëse duke përmendur
pozitën e presidentes, ministreve e deputetet.
Ministrja Gërvalla theksoi nevojën për inicim të projekteve të veçanta për të
zbutur papunësinë e sidomos tek gratë. Në këtë drejtim e njoftoi homologen e
saj me përpjekjet e Qeverisë së Kosovës për të krijuar një klimë të
përshtatshme për tërheqje të investimeve që do të mundësonin hapje të vendeve
të reja të punës.
Në takim u theksua edhe nevoja që të trajtohen me seriozitet çështjet që lidhen
me sundimin e ligjit, lirinë e medias si dhe nevoja për reformë zgjedhore.
Nga ana tjetër sa i përket bashkëpunimit bilateral, mes Kosovës dhe Suedisë,
kryediplomatet biseduan për marrëdhëniet e shkëlqyeshme në mes të dy vendeve. Ministrja
Gërvalla theksoi se Kosova është shumë mirënjohëse për miqësinë dhe mbështetjen
e madhe të shtetit të Suedisë në të gjitha fushat.
Po ashtu folën për mundësitë e thellimit të këtij bashkëpunimi si dhe për
bashkëpunimin rajonal.