Ministrja Tahiri i përgjigjet Rakiqit për murin në veri

Prishtinë | 19 Dhj 2016 | 14:35 | Nga

Ministrja për Dialog me Serbinë, Edita Tahiri ka reaguar ndaj deklaratës së kryetarit të Mitrovicës Veriore, Goran Rakiq i cili tha se janë pajtuar pikërisht me ministren kosovare për murin, i cili nuk do të rrënohet, por vetëm do të ridizajnohet.

Në një prononcim të dhënë për Gazetën Blic, Edita Tahiri ka thënë se kjo deklaratë e Rakiqit nuk është e vërtetë, derisa është shprehur e bindur se muri do të rrënohet përfundimisht.

“Deklarata e Rakiqit nuk është e vërtetë”, ka thënë Tahiri, duke shtuar se muri do të hiqet.

“Gjitha institucionet, pozita dhe opozita janë kundër këtij muri dhe logjikës së mureve. Presidenti, kryeministri dhe kryetari i kuvendit e kanë bërë të qartë qëndrimin shtetëror se nuk do të ketë mur, do të hiqet së shpejti. Muri nuk ka qenë pjesë e marrëveshjeve në Bruksel. Në fakt me këtë muri të dirigjuar nga Serbia është shkelur marrëveshja e Brukselit”, tha ajo për Gazetën Blic.

Në anën tjetër, Rakiq u ka thënë sot mediave se “muri prej betoni ndërmjet jugut dhe veriut të Mitrovicës, nuk do të rrënohet, por do të ridizajnohet…”

“Çdo gjë do të bëhet duke u bazuar në projekt, i cili është i definuar nga viti i kaluar e që sivjet është konfirmuar në Bruksel”, ka shtuar Rakiq.

Sipas tij, tashmë është arritur marrëveshja që muri të ridizajnohet me shkallë, me çka është pajtuar edhe Edita Tahiri.

“Bisedimet janë mbajtur në Prishtinë dhe kanë zgjatur disa orë. Është definuar çdo gjë qartë nga tri palët dhe muri do të shkurtohet për 90 cm dhe do të ndërtohen shkallët”, deklaroi Rakiq.

Fjalë Kryesore:

Të ngjashme