Kandidati për deputet nga LDK në zgjedhjet e fundit, Muhamet Hamiti, ka thënë se kontrollimi reciprok i pushteteve mundëson funksionimin demokratik të shoqërisë dhe shtetit.

“Njerëzit me mendësi autoritare – komunistët në radhë të parë – e duan pushtetin absolut. Ky soj autokratësh kontrollin reciprok të pushteteve e sheh si cenim të pushtetit të tyre”, është shprehur Hamiti, transmeton Klan Kosova.

Javën e kaluar ka qenë Arban Abrashi nga kjo parti që si mysafir në Klan Kosova e ka përdorur shprehjen “Checks and balances” derisa ka folur për peripecitë në mes të LDK-së dhe Vetëvendosjes për të arritur marrëveshjen për koalicion bashkëqeverisjes.

Janë këto dy subjekte; LVV si e para dhe LDK si e dyta e dalë nga zgjedhjet e 6 tetorit ende nuk po mund të dakordohen lidhur me pozitën e presidentit.

Nga deklarimet e zyrtarëve të LDK-së shihet se ata nuk duan që LVV-së t’ia lënë edhe pozitën e kryeministrit edhe të presidentit, për çfarë është deklaruar Hamiti tash.