Pas dështimit në Interpol, SHBA vjen me përkrahje të fuqishme për Kosovën

Prishtinë | 20 Nën 2018 | 10:49 | Nga Ekonomia Online

Ambasada Amerikane në Kosovë ka dalë me një reagim pas dështimit të Kosovës për t’u bërë pjesë e Interpolit.

Në këtë komunikatë thuhet se Policia e Kosovës është institucion i integruar dhe i aftë nqë ka dëshmuar qartazi se ka ndihmuar në shpërbërjen e rrjeteve ndërkombëtare terroriste, të krimeve kibernetike, narkotikëve, armëve dhe të trafikimit me qenie njerëzore.

Ambasada thotë se shumica e vendeve e kanë përkrahur Kosovën në rrugën evropiane përkundër fushatës së Serbisë për t’iu bërë presion vendeve për ta kundërshtuar kërkesën e Kosovës.

Ata në letrën e tyre kanë thënë se Kosova dhe Serbia duhet të normalizojnë raportet dhe të arrijnë një marrëveshje nëse dëshirojnë që të ecin përpara në rrugën evropiane.

Letra e plotë:

Policia e Kosovës është institucion i integruar plotësisht dhe i aftë, që ka dëshmuar qartazi se ka ndihmuar në shpërbërjen e rrjeteve ndërkombëtare terroriste, të krimeve kibernetike, narkotikëve, armëve dhe të trafikimit me qenie njerëzore. Shumica e vendeve e kanë parë këtë gjë dhe e kanë mbështetur kërkesën e Kosovës për anëtarësim në INTERPOL, përkundër fushatës, të udhëhequr nga Serbia, për t’iu bërë presion vendeve për ta kundërshtuar kërkesën e Kosovës. Mbështetja për anëtarësimin e Kosovës në INTERPOL kurrë nuk ka qenë për pranimin e pavarësisë së Kosovës, por për forcimin e bashkëpunimit ndërkombëtar në fushën e zbatimit të ligjit dhe për të mbyllur një boshllëk kritik të sigurisë në Ballkan. Me këtë rezultat, të gjithë humbasim.

Ne vazhdojmë fuqimisht ta mbështesim dialogun ndërmjet Kosovës dhe Serbisë, të mundësuar nga BE-ja. Tani më shumë se kurrë, të dy palët duhet ti shpejtojnë përpjekjet e tyre për të arritur marrëveshje për normalizimin e plotë, që është mënyra e vetme për të dy vendet për të ecur përpara në rrugëtimin e tyre për anëtarësim në BE. Të dyja, Serbia dhe Kosova duhet ta kuptojnë se rrugëtimi i tyre drejt të ardhmes evropiane shkon përmes normalizimit. Për ta arritur këtë, i nxisim të dy vendet që ti shmangin provokimet dhe të punojnë së bashku për arritjen e një ujdie.

Fjalë Kryesore:

Të ngjashme