PDK ia kthen sot përgjigjen Hotit që ia kërkoi një zyrtar për Uashington

Prishtinë | 27 Gus 2020 | 15:41 | Nga Ekonomia Online

Kryeministri Avdullah Hoti ia ka kërkuar nga një përfaqësues për delegacion në Uashington opozitarëve. Lëvizja Vetëvendosje menjëherë e ka refuzuar, ndërsa Memli Krasniqi i PDK’së thotë se partia e tij i kthen përgjigje sot kryeministrit.

Kryeministri Hoti, që do ta drejtojë delegacionin e Kosovës në me Serbinë, në Shtëpinë e Bardhë në SHBA, dëshiron që me vete të ketë edhe përfaqësues të opozitës.

Dje në konferencë për media ka thënë se tashmë u ka dërguar letra partive opozitare për t’u kërkuar që të bëhen pjesë e ekipit të tij përballë Serbisë.

Partia Demokratike e Kosovës akoma nuk dihet nëse do të jetë pjesë e delegacionit kosovar, ndërsa nënkryetari i saj, Memli Krasinqi thotë se gjatë ditës “e kthejmë përgjigjen sot”.

Ndërkaq, LVV-ja e ka refuzuar menjëherë. Zëdhënësi i saj, Përparim Kryeziu, ka renditur arsyet pse kjo parti nuk pranon të jetë pjesë e delegacionit, që kryeministri Hoti do ta udhëheqë.

“Në përputhje me qëndrimet tona në raport me këtë qeveri jolegale dhe jolegjitime, për arsyet e lartëpërmendura, por jo vetëm, Lëvizja VETËVENDOSJE! nuk do t’i përgjigjet pozitivisht kësaj ftese. Pozicioni ynë në këtë çështje është i qartë. Kosova mund të dialogojë me Serbinë vetëm pas zgjedhjeve të parakohshme kur do të kemi qeveri me legjitimitet të plotë, që harton, prezanton dhe siguron unitet përmes një platforme që merr mbështetjen e 2/3 të deputetëve në Kuvend si dhe duke u nisur gjithnjë nga reciprociteti si parim i marrëdhënieve të barabarta ndërshtetërore”, ka shkruar Kryeziu në Facebook.

PDK’ja në qershor, kur ishte caktuar takimi i parë mes Kosovës dhe Serbisë në Shtëpinë e Bardhë, e kishte mirëpritur iniciativën e amerikanëve për ndërmjetësim.

Ai takim u anulua pasi Prokuroria në Hagë publikoi njoftimin se ka dorëzuar aktakuzën ndaj presidentit Hashim Thaci në ditën kur ai ishte nisur për në takimin e Uashingtonit.

Ndërkaq LVV-ja ka kritikuar organizimet që po i bën Richard Grenell, emisar special i Presidentit amerikan Donald Trump, për dialogun Kosovë – Serbi.

Kreu i LVV’së, ka kërkuar që Kosova ta kundërshtojë njëzëri Grenellin.

“sa i përket të dërguarit të posaçëm Grenell, meqenëse ai ka thënë se Kosova duhet ta heqë reciprocitetin me Serbinë, mendoj se duhet të veprojmë me të njësoj siç vepruam me ambasadorin Gelbard kur në 1998 tha se UÇK-ja është terroriste, pra ta kundërshtojmë njëzëri, në mënyrë që ta kuptojë se kjo qasje është e papranueshme për ne”, shkroi Kurti para gjashtë ditësh.

Raportet mes Kurtit dhe emisarit të Trumpit u acaruan, kur Grenell kërkonte vazhdimish atij sa ishte kryeministër që të hiqte tarifën ndaj produkteve serbe. Kurti nuk e hoqi tarifën, ndërsa më vonë LDK’ja ngriti mocion mosbesimi me arsyen kryesore “rrezikimin e raporteve me SHBA’në”. 

Të ngjashme