Agjencia Kosovare e Pronës vazhdon të udhëhiqet në mënyrë të kundërligjshme me ushtrues të detyrës së zëvendësdrejtorit ekzekutiv që nga 29 korrik 2014, kjo për shkak se Qeveria e Kosovës ende nuk ka propozuar dy emra, njërin për pozitën e drejtorit dhe tjetrin për zëvendësdrejtor të kësaj agjencie.

Sekretari i Kuvendit, Ismet Krasniqi, ka thënë se janë gjithsej tetë agjenci dhe institucione të pavarura të pakompletuara dhe ka përmendur: Agjencinë Kosovare të Pronës (Sekretariati ekzekutiv, Komisioni i ankesave dhe Bordi mbikëqyrës, të pakompletuar); Institucionin e Avokatit të Popullit; Agjencinë Shtetërore për Mbrojtjen e të Dhënave Personale; Autoritetin Rregullativ të Hekurudhave; Këshillin Kombëtar të Shkencës dhe Këshillin Gjyqësor të Kosovës.

Në Agjencinë e Pronës pozita e drejtorit është e zbrazët që nga gushti i vitit të kaluar, ndërkohë që pozita e zëvendësdrejtorit nga korriku i vitit 2014 ushtrohet nga një ushtruese e detyrës së zëvendësdrejtorit ekzekutiv, që sipas rregulloreve në fuqi mund të zgjasë vetëm tre muaj. Mandati, ushtrueses së detyrës së zëvendësdrejtorit ekzekutiv, Florije Kika, i ka përfunduar qe 21 muaj./KD/