Vegla në duar të shqiptarëve janë etiketuar nga Serbia të gjithë ata që nuk janë me Listën Serbe. Beogradi nuk dëshiron të shohë në garë subjekt tjetër politik për zgjedhjet e 6 tetorit në Kosovë. Ata që vendosën ta sfidojnë Listën Serbe kanë folur për presione, shantazhe e frikësime. Disa prej familjarëve të cilët kanë lidhje me kandidatët që janë në garë për zgjedhjet 6 tetorit, tashmë kanë humbur vendet e punës, shkruan sot Koha Ditore.
Rivalët e Listës Serbe kanë thënë se, edhe duan bashkëpunim me Beogradin, por jo të shndërrohen në marionetë, sikurse ka ndodhur me subjektin që u krijua pas marrëveshjes së 19 prillit të vitit 2013 mes Kosovës dhe Serbisë. Kërcënimet kanë shkuar aq larg, saqë është kërkuar edhe ndërhyja e organeve të ndjekjes. Por Prokuroria e Shtetit nuk ka treguar nëse zyrtarisht ka nisur hetimet për kërcënuesit. Me situatën në mjediset serbe është njoftuar edhe Misioni i Vëzhguesve të Bashkimit Evropian.
Nenad Rashiq është kandidat për kryeministër nga koalicioni “Liria”. Ai ka thënë se janë duke vepruar në kushte shantazhi e presioni.
“Agresiviteti është rritur dhe është bërë më brutal. Zonja e një aktivisti të partisë sonë është kontrolluar në detaje, është marrë në pyetje, i kanë thënë se kontrata i skadon në tetor. Kështu është që prej themelimit të Listës Serbe në vitin 2013”, ka thënë Rashiq, i cili ka qenë pjesë e një debati të organizuar në Qendrën Mediale në Çagllavicë. Në rrethana të tilla, sipas tij, rezultati i zgjedhjeve është në plan të dytë, pasi ka frikë se mund të cenohet jeta e qytetarëve.