Deputeti në Kuvendin e Kosovës nga radhët e LDK-së, Driton Selmanaj, ka thënë në emisionin Pressing në T7 se rrëzimi i Qeverisë Kurti 1 vitin e kaluar nga ana e LDK-së ishte vendim i drejtë.

Ai thotë se njerëzit e VV-së ende kanë qasje destruktive në raport me partnerët ndërkombëtarë, përkatësisht SHBA-në.

“Marrëdhëniet tona me SHBA-në ishin rrezikuar seriozisht. Po e them seriozisht dhe gjendja ishte e rëndë. Qasja destruktive e këtyre njerëzve që janë në pushtet tani nuk besoj që ka ndryshuar. Janë po të njëjtit dhe shumë shpejt koha do ta provojë këtë”, tha ai.

“Njerëzit do të thonë se nuk paskan pasur faj këta që e kanë rrëzuar atëherë. 200 milionë ishin bllokuar. Kjo është fakt. Trajnimet e FSK-së me trupa amerikane ishin ndaluar. Edhe kjo është fakt”, shtoi ai.

Selmanaj thotë se po ashtu se njerëz brenda LDK-së nuk kishin guxim që të merrnin përgjegjësinë të dilnin si kandidatë për kryeministër në zgjedhjet e kaluara.