Sulmi kibernetik zbulon bisedimet sekrete mes Shqipërisë e Britanisë për emigrantët

Prishtinë | 20 Sht 2022 | 08:55 | Nga Ekonomia Online

Sulmi kibernetik iranian ndaj Shqipërisë ekspozoi bisedime sekrete midis Mbretërisë së Bashkuar dhe Shqipërisë për luftimin e krimit të organizuar dhe imigracionit të paligjshëm.

Irani është akuzuar nga Shqipëria dhe SHBA-ja për sulmin ndaj sistemeve kompjuterike të përdorura nga Policia e Shtetit për të gjurmuar emigrantët që hyjnë dhe dalin nga vendi, si dhe për rrjedhjen e të të dhënave të tjera konfidenciale.

Ai vjen vetëm disa ditë pasi SHBA-ja dënoi Teheranin për një sulm të mëparshëm kibernetik që ndërpreu shërbimet e qeverisë shqiptare në korrik.

Dokumentet e qeverisë së Mbretërisë së Bashkuar, që supozohet se janë hakuar nga iranianët, janë shënuar “sensitive” dhe u zbuluan gjatë fundjavës në kanalin e koduar Telegram.

Ato zbulojnë negociatat konfidenciale midis Britanisë dhe Shqipërisë mbi masat për të luftuar bandat e krimit dhe imigracionin ilegal brenda dhe jashtë shtetit. Një zbulim i tillë, shkruan The Telegraph, shton frikën se të dhënat konfidenciale operacionale të qeverisë mund të aksesohen nga kriminelët.

Një memorandum tjetër u ra dakord javën e kaluar nga parlamenti i Shqipërisë për të ndarë të dhënat kriminale dhe biometrike për emigrantët shqiptarë që kalojnë Kanalin ilegalisht me agjencitë e zbatimit të ligjit në Mbretërinë e Bashkuar. Ata tani përbëjnë deri në 60 për qind të të gjitha mbërritjeve me varka të vogla.

Dokumentet e brendshme të publikuara në kanalin Telegram përfshijnë korrespondencën me email në shkurt 2022 midis Gledis Nano, drejtori i atëhershëm i policisë së Shqipërisë, dhe Alastair King-Smith, ambasadori i Mbretërisë së Bashkuar në Shqipëri. Është në mesin e 1, 400 email-eve të hakuara dhe të zbuluara që përfshijnë zotin Nano.

Në një email, shefi i policisë falënderon zotin King-Smith për ndihmën e tij, duke theksuar se “në të vërtetë ne kemi nevojë për mbështetjen tuaj tani dhe në të ardhmen për përpjekjet tona të përbashkëta kundër krimit të organizuar”.

Ai zbulon se Forca Kufitare propozon të vendosë oficerë në Shqipëri për të ndihmuar në planet për një zgjerim të madh të porteve në Shqipëri dhe për të këshilluar mbi masat e sigurisë që mund të merren për të luftuar imigracionin e paligjshëm dhe importin e kokainës në Evropë nga bandat e krimit të organizuar.

Memorandumi, i zbuluar në rrjedhje, tregon se roli i Forcave Kufitare do të përqendrohet në portet shqiptare të Durrësit dhe Porto Romanos për të “vlerësuar trafikun e kontejnerëve, pasagjerët, portet dhe sistemet IT të zbatimit të ligjit, dhe aftësitë aktuale operacionale që ekzistojnë brenda portit”.

Ai zbulon gjithashtu përpjekjet për të krijuar një “qasje të integruar” midis Shqipërisë dhe Malit të Zi për të luftuar kontrabandën e drogës dhe njerëzve përmes Durrësit, Porto Romanos dhe Tivarit në Mal të Zi.

Agjencia Kombëtare e Krimit (NCA) ka identifikuar se bandat shqiptare qëndrojnë prapa shumicës së tregtisë evropiane të kokainës, veçanërisht në jug të Anglisë.

Agjencitë e zbatimit të ligjit kanë frikë se rritja e numrit të shqiptarëve që tentojnë të hyjnë ilegalisht në Mbretërinë e Bashkuar përmes Kanalit me varka të vogla, po ofron një burim të gatshëm rekrutimi për bandat që veprojnë në MB.

Haerkimi më i fundit i detyroi zyrtarët shqiptarë të hiqnin përkohësisht sistemin e menaxhimi të informacionit, i përdorur për të gjurmuar të dhënat e atyre që hyjnë dhe dalin nga Shqipëria, sipas një deklarate nga ministria e brendshme e Shqipërisë. Ka të ngjarë që disa nga të dhënat mund të ndahen me Mbretërinë e Bashkuar sipas marrëveshjes së re.

Sulmi kibernetik ishte vepër e “të njëjtëve agresorë” që kryen hakerimin e korrikut, pretendohet në një postim në Tëitter nga kryeministri Edi Rama.

Incidenti përbën një sfidë të re për administratën e Presidentit Joe Biden, e cila javën e kaluar u zotua se do ta “mbajë Iranin përgjegjës për veprimet që kërcënojnë sigurinë e një aleati të SHBA-së” dhe anëtarit të NATO-s pas sulmit kibernetik të korrikut.

Departamenti i Thesarit të premten e kaluar sanksionoi agjencinë e spiunazhit të Iranit për kryerjen e hakerimit të korrikut. Shqipëria ndërpreu marrëdhëniet diplomatike me Iranin në atë që mund të jetë rasti i parë i hakerimit që shkaktoi një ndërprerje të lidhjeve midis vendeve.

Ambasada e Iranit në Bruksel ka “kundërshtuar akuzat e pabaza” se Irani ishte pas hakerimit të korrikut.

Zyra e Brendshme Britanike tha se nuk do të komentonte lidhur me informacionet e rrjedhura. 

Të ngjashme