Tahiri e fajëson Qeverinë për numrin e madh të vdekjeve nga Covid-19: Vushtrrinë e fitoj pa balotazh

Prishtinë | 18 Sht 2021 | 10:57 | Nga Fitore Berisha Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Gjendja e rëndë me pandeminë, mungesa e stafit shëndetësor, janë ndër sfidat që u përball komuna e Vushtrrisë. Kreu i kësaj komune, Xhafer Tahiri, në një intervistë për Ekonomia Online, thotë se kanë angazhuar staf shtesë në Drejtorinë për Shëndetësi për t’iu dalë në ndihmë qytetarëve, të cilët u përballen me pandeminë.

Kritika ka edhe për ekzekutivin, teksa thotë se numri i lartë i vdekjeve ndërlidhet me menaxhimin nga Qeveria Kurti.

“Në Vushtrri kemi pasur një situatë jashtëzakonisht të rëndë sepse kemi pasur një numër të lartë të vdekjeve. Ne kemi angazhuar staf shtesë në drejtorinë për Shëndetësi për t’i dalë në ndihmë qytetarëve. Dhe poashtu kemi rritur shërbimet si në laborator ashtu edhe shërbimet stomatologjike dhe me buxhet të komunës kemi shtuar blerjen e barnave esenciale në mënyrë që t’i lehtësohet barra e rëndë qytetarëve si rezultat i pandemisë Covid19”, u shpreh Tahiri.

Duke folur për menaxhimin e pandemisë, theks të veçantë i jep procesit të vaksinimit, duke thënë se qendra për vaksinim do të duhej të punonin edhe vikendit.

Ai thotë se nëse një gjë e tillë do të bëhej, sipas tij rastet e vdekjes nuk do të ishin kaq të larta.

“Numrat flasin që në fakt nuk ka pasur menaxhim të pandemisë gjatë tërë verës. Qendrat e vaksinimit që menaxhohen nga ministria e Shëndetësisë kanë qenë të mbyllura gjatë vikendit në kohën kur temperaturat kanë qenë 40 gradë. Do të duhej të kishim punë të shtunën dhe të dielave dhe qendra mobile të vaksinimit gjatë tërë verës në mënyrë që tash të mos i kishim tërë këto vdekje prandaj nuk kemi parë menaxhim dhe kanë munguar edhe vizitat në teren”, tha Tahiri.

Numri një i Vushtrrisë ka folur edhe për zgjedhjet e 17 tetorit, ku synon edhe një mandat nën petkun e LDK-së. Madje, shprehet i bindur këtë komunë do ta fitojë pa balotazh.

“Ne po punojmë bashkë me ekipin tim dhe përveç ekipit të LDK-së kemi edhe një koalicion të gjerë edhe me parti të tjera që kanë qenë në asamblenë komunale Partinë e Drejtësisë, AKR-në po punojmë që të fitojmë pa balotazh. Numrat tregojnë që me 17 tetor do të përfundojë gara me një fitore tonën”, u shpreh Tahiri për EO.

Mes tjerash, Tahiri foli edhe për punën që kanë arritur të kryejnë për 4 vjet, duke theksuar se do të vazhdojnë me projektet e radhës edhe për një mandat tjetër.

Ai tha se do të fokusohen në punësimin e grave dhe të të rinjve.

“Punën që kemi bërë në këto katër vjet ne kemi arritur që t’i përmbushim të gjitha premtimet që u kemi dhënë qytetarëve të Vushtrrisë. S0hoh një disponim tepër të mirë të qytetarëve për të mbështetur kandidaturën time edhe për një mandat katërvjeçar”.

“Fokusi ynë do të jetë punësimi i grave dhe i të rinjve. Po ashtu kemi përgatitur një plan me 10 pika me projektet vitale infrastrukturore që do të transformojnë Vushtrrinë në 10 vjetët e ardhshëm. Ky plan parasheh ndërtimin e ngrohtores së qytetit, ndërtimin e parkingjeve publike, dhe liqenin akumulues në Sllakoc që janë projekte jashtëzakonisht të rëndësishme infrastrukturore që edhe krijojnë punësim po edhe krijojnë zhvillim për Vushtrrinë”.

“Në këtë mandat kemi ndërtuar dy çerdhe të reja në Vushtrri dhe tani kemi tri çerdhe publike në qytet. Në mandatin e ardhshëm do të ndërtojmë edhe dy çerdhe të reja në qytetin e Vushtrrisë”.

Të ngjashme