Tahiri pas vizitës në Asamblenë Parlamentare: Kemi shumë punë për anëtarësim në Këshillin e Evropës

Shefi i Grupit Parlamentar të AAK-së, Besnik Tahiri po merr pjesë në takimin e Komitetit për Çështje Politike dhe Demokraci të Asamblesë Parlamentare të Keshillit të Evropës.

Deputeti i AAK-së u shpreh se në gjendjen momentale prioriteti i këtij institucioni është gjendja në Ukrainë.

‘Vendet Evropiane janë të unifikuara në qëndrimet e veta për luftën në Ukrainë, por ende disi hezitojnë t’i thonë qendrimet qartë dhe saktë’, tha Tahiri.

Ndërkaq, sa i përket procesit të anëtarësimit të Kosovës në Këshillin e Evropës, Tahiri theksoi se ende ka shumë punë që duhen kryer. Ndër të tjera, Tahiri shpalosi disa sygjerime në lidhje me procesin e anëtarësimit në Këshillin e Evropës

1. Prioriteti i këtij institucioni është Ukraina dhe vetëm Ukraina;
2. Roli i Rusisë dhe vendeve aleate të saj janë jashtë ndikimit, pra tani për tani nuk kanë mundësi me na penguar;
3. Deklaratat se është momentumi i duhur për aplikim, duhet të studiohen seriozisht e mirë, me maturi, e jo me tifozëri. Sipas vlerësimit tim, nuk janë punët për deklarime pompoze, por për avokim strategjik e politikë ‘pa zhurmë’.
4. Urgjentisht duhet ta forcojmë me personel e kapacitete logjistike e buxhetore Konsulatën tonë në Strasburg.
5. Në prill (25-29) delegacioni ynë duhet të vijë këtu me plan konkret, deri atëherë mos të bëjnë shumë tweeta.