Thaçi: Institucionet dhe qytetarët të përmbahen nga çdolloj provokimi e të ruajnë qetësinë

Prishtinë | 04 Gus 2018 | 10:31 | Nga

Presidenti Hashim Thaçi, përmes një deklarate ka kërkuar nga të gjithë qytetarët e Kosovës që të përmbahen nga çdolloj provokimi dhe të ruajnë qetësinë.

Thaçi ka thënë se draft-statuti i Asociacionit do të bëhet përmes respektimit të Kushtetutës së vendit.

Deklrata e plotë e Thaçi:

Republika e Kosovës është e përkushtuar për arritjen e një marrëveshje historike, ligjërisht të detyrueshme, në kuadër të fazës së fundit të dialogut për normalizimin e marrëdhënieve ndërmjet Kosovës dhe Serbisë.

Gjatë këtij rrugëtimi të domosdoshëm për sigurimin e paqes afatgjate në Ballkanin Perëndimor, Republika e Kosovës do t’i përmbahet me përpikëri zotimeve për të ruajtur qetësinë dhe mos rrezikuar në asnjë mënyrë objektivin për normalizimin e plotë të marrëdhënieve ndërmjet dy vendeve.

Pas krijimit të Ekipit Menaxhues, institucionet e Kosovës janë të përkushtuara që të finalizojnë punën në hartimin e draft-statutit të Asociacionit të Komunave me shumicë serbe në Kosovë, bazuar në marrëveshjet e arritura më 2013 dhe 2015 në Bruksel, ndërmjet Kosovës dhe Serbisë, duke u bazuar në vendimin e Gjykatës Kushtetuese të Republikës së Kosovës.

Prandaj, si president i vendit u bëjë thirrje të gjithë qytetarëve, institucioneve dhe palëve të përfshira në këtë proces, që të përmbahen nga çdolloj provokimi dhe të ruajnë qetësinë në një kohë shumë të rëndësishme për vendin tonë.

Fjalë Kryesore:

Të ngjashme