Veseli pas takimit me mjekët e studentët: Qeveria t’i mbështesë punëtorët shëndetësorë, Ligji për paga të kthehet në Kuvend

Prishtinë | 03 Nën 2020 | 15:24 | Nga Kastriot Kokollari Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Kryetari i Partisë Demokratike të Kosovës, Kadri Veseli sot ka vizituar Odën e Mjekëve, ku është me takuar kryetarin, Pleurat Sejdiu dhe kryetarin e Federatës Sindikale të Shëndetësisë, Blerim Syla.

Veseli ka kërkuar paga më dinjitoze për punonjësit shëndetësorë duke bërë thirrje që Ligji për Paga të rikthehet në Kuvend për amandamentim në përputhje me rekomandimet e Gjykatës Kushtetuese.

“Qëllimi i vizitës time është për falënderim për të gjithë mjekët dhe punëtorët shëndetësorë për punën e tyre të jashtëzakonshme që janë duke e bërë. Kemi shumë obligim që si politikë të qëndrojmë afër tyre dhe t’i ndihmojmë. Si parti opozitare do të përkrahim çdo iniciativë të qeverisë, e në veçanti amandamentimin e ligjit për paga që mund ta bëjmë brenda një jave. Në këtë mënyrë ne mund të jemi pranë punëtorëve shëndetësorë. Këta po e bëjnë punën e tyre, dhe ne duhet ta bëjmë tonën”.

“Unë sot isha për ngushëllime tek një tjetër mjek, ish bashkëluftëtar i imi, Dr. Safet Idrizi i cili dikur e fitoi luftën me Serbinë por sot e ka humbur betejën me COVID-in. Sikurse u ka shërbyer atëherë njerëzve, ai ka qenë në krye të frontit edhe këto ditë si mjek. Fakti që nëntë mjekë kanë humbur jetën me këtë sëmundje dhe rreth 1300 punëtorë shëndetësorë janë infektuar, flet për nevojën e madhe që e kanë për mbështetje”, ka thënë kryetari Veseli.

Edhe kryetarët e Odës së Mjekësve, Sejdiu dhe të Federatës Sindikale, Syla e falendëruan për vizitën liderin e PDK-së, duke e përgëzuar qasjen e tij dhe interesimin, në veçanti për mbështetjen e PDK-së që të rikthehet sa më parë në Kuvendin e Kosovës i ligjit për paga.

Sejdiu ka thënë se kryetari i PDK-së është politikani i parë që i ka vizituar.

Sipas tij, Veseli ka shprehur gatishmërinë që t’i shtyjë përpara proceset sa i përket personelit shëndetësore si dhe sistemit në përgjithësi.

“Kadri Veseli është politikani i parë që na ka vizituar që nga funksionalizimi i Odave, do të thotë që tri vite. Ne shprehëm një pasqyrë të punës që janë duke bërë mantelbardhëve, kushtet në të cilat janë duke punuar dhe perspektivën që secili politikan në Kosovë duhet ta shtyjë përpara, në mbështetje të punëtorëve shëndetësorë, e sidomos në këto ditë të rënda”.

“Ne pamë një gatishmëri të zotri Veselit, si kryetar i partisë në opozitë që të shtyjë proceset përpara, sa i përket personelit shëndetësorë por edhe sistemit si sistemi e sidomos gjatë aktiviteteve gjatë kësaj periudhe të rëndë”.

Kryetari Veseli gjatë ditës ka takuar edhe studentët e Fakultetit të Mjekësisë, të cilëve u ka kërkuar që të qëndrojnë në Kosovë pas studimeve, për të kontribuar për vendin dhe jo të largohen jashtë.

“Kosova si vendi me numrin më të vogël të punonjësve shëndetësorë ka nevojë për mjek të rinj për të arritur standarde ndërkombëtare të shërbimeve shëndetësore. Një ndër synimet tona është krijimi i vendeve të reja të punës për mjekët e ardhshëm, pra për ju që sot jeni studentë, por edhe për profesionistët e diplomuar që kanë mbetur pa punë. Jam i lumtur që në mandatin e fundit, PDK-ja duke udhëhequr me ministrin Urain Ismaili ka bërë shumë për shëndetësinë dhe do të bënte edhe më tepër deri në fund të mandatit”, u ka thënë Veseli studentëve të mjekësisë.

Të ngjashme