Ka filluar seanca publike në Gjykatën Kushtetuese ku po diskutohet për ligjshmërinë e votës së deputetit Etem Arifi në seancën ku u votua Qeveria Hoti, raporton Gazeta Express.

Me këtë rast, Blerim Sallahu, këshilltar ligjor në Lëvizjen Vetëvendosje, tha se Etem Arifi dhe institucionet e drejtësisë e kanë mbajtur të fshehtë që Arifi është dënuar me vendim të formës së prerë.

Sipas tij, Arifi kishte gënjyer KQZ-në duke mos e paraqitur në formularin për certifikim dënimin që i është shqiptuar.

“Etem Arifi ka gënjyer me qëllim duke paraqitur në formularin për certifikim deklaratën se kandidatura e tij është në përputhshmëri me nenin 29. Ai ka cenuar rëndë interesin publik derisa ka kandiduar si deputet. Arifi nuk kishte informuar KQZ-në se ai ishte dënuar me vendim të formës së prerë para certifikimit të tij. Asnjë institucion i drejtësisë nuk e ka informuar KQZ-në për një vendim të tillë”, tha ai.

Sallahu tha se Qeveria Hoti nuk ka arritur të marrë 61 vota për shkak që Arifi ka humbur mandarin e deputetit.

“Qeveria nuk ka arritur t’i marrë 61 vota. Kjo për arsye se Etem Arifi ka humbur mandatin e deputetit për faktin se është dënuar me vendim të formës së prerë të Gjykatës së Apelit. Përbërja e qeevrisë nuk ka marrë shumicën e votave për zgjedhjen e saj siç është e caktuar me kushtetutë”, shtoi ai.