Xhemaj, PDK: Antiamerikanizmi i Kurtit, top-dështimi në 100 ditëshin e punës së qeverisë

Prishtinë | 15 Maj 2020 | 14:25 | Nga Ekonomia Online

Partia Demokratike e Kosovës e ka cilësuar si top dështimin e qeverisë së Kurtit, qasjen e tij antiamerikane duke akuzuar herë Presidentin Trump e herë ambasadorin Grenell.

Në një postim në Facebook, drejtori për komunikim në PDK, Bashmir Xhemaj ka thënë se deklaratat tallëse e përcmuese “Amelika..Amelika” dhe sulmet ndaj SHBA-së u përdorën nga kundërshtarët e Kosovë dhe Amerikës.

Ky është postimi i plotë i tij:

Kur kryeministri Kurti përgojonte Amerikën dhe Shtëpinë e Bardhë nga foltorja e kuvendit dhe sulmonte më vonë në mediat ndërkombëtare për ndërhyrje në rrëzimin e qeverisë, u mendua si një shkarje momentale e tij. Shprehjet poshtëruese të tipit “shtëpia e bardhë, shtëpia e verdhë” u konsideruan si pasojë të ngarkesës së tij emocionale. Edhe kur sulmoi disa herë hapur dhe publikisht të dërguarin e Presidentit Trump, ambasadorin Grenell për qëndrime të njëjta me ato të Beogradit, sërish u arsyetuan si deklarata të shkëputura dhe që nuk janë kundër Amerikës. Madje lidershipi i Vetëvendosjes nëpër media u distancua nga linçimi e fyerjet që militantët e kësaj partie bënin në rrjetet sociale kundër figurave kryesore shtetërore të SHBA-ve.

Por e vërteta është ndryshe, sepse ato deklarata u përsëritën me vetëbesim dhe me zë të lartë nga kryeministri i shkarkuar. Ato janë qëndrime në vazhdimësi të Kurtit i cili është tallur me Amerikën dhe përfaqësuesit e saj më të lartë. Ai sërish projeksionin e tij të antiamerikanizmit e reduktoi në fjalët tallëse, shpotitëse e përçmuese Amelika..Amelika..Amelika!

Qasja e tij kundër Amerikës është njëri nga top-dështimet më të mëdha në politikën e jashtme të tij si kryeministër në 100 ditëshin e punës së qeverisë. Nga vendi më pro-amerikan në botë, ai e katandisi Kosovën në një vend me sanksione prej amerikanëve. Dhe si të mos mjaftonte, të njëjtën frymë e ndoqën edhe anëtarët e kabinetit të tij. Fatkeqësisht jehona e këtyre deklaratave të pazakonshme të një kryeministri të Kosovës u transmetuan në New York Times, The Economist e Foreign Policy. Armiqtë e Kosovës dhe të Amerikës i përdorën këtë deklarata për të sulmuar çdo të arritur të përbashkët në këto njëzet vite si lirinë, pavarësinë dhe shtetëndërtimin e Kosovës.

Të ngjashme