Zaev: Mbështesim edhe ndryshimin e kufijve Kosovë-Serbi si zgjidhje

Prishtinë | 17 Shk 2019 | 15:18 | Nga Ekonomia Online

Në kuadër të  Konferencës së Sigurisë që është zhvilluar në Mynih të gjitha deklaratat e liderëve dhe pjesëmarrësve ishin ato të zakonshmët por ai që bëri dallimin ishte kryeministri i Maqedonisë së Veriut, Zoran Zaev, transmeton Gazeta Metro.

Në një bisedë me Deutsche Wellen, kryeministri i Maqedonisë, Zoran Zaev lidhur me debatin për ndryshim kufijsh mes Kosovës e Serbisë theksoi se, pas zgjidhjes së problemit të Maqedonisë së Veriut me Greqinë, tani mbeten çështja e Kosovës dhe Bosnja si problemet që duhen zgjidhur.

“Ja pse ne e mbështesim çdo zgjidhje dhe do të promovojmë bashkëpunimin, të garantojmë paqen dhe çojmë përpara axhendën tonë dhe ajo është integrimi në BE. Dhe kjo është e mundur të arrihet. Nuk po hyj në detaje, sepse nëse dikush nga vendet fqinje komenton detajet, kjo mund të kthehet në një problem. Kjo është çështje mes Beogradit dhe Prishtinës, unë besoj, se ata do ta gjejnë një zgjidhje. Shpresoj për një zgjidhje pozitive dhe miqësore, dhe dua t’i ndihmoj të dy presidentët dhe qeveritë e tyre”, ka thënë Zaev.

Zaev ka thënë se ndryshimi i kufijve të Kosovës nuk do të mund të ndikojë në Maqedoni pasi që kjo gjë është mbyllur me anatarësimin e vendit në Nato.

Ndërsa i pyetur, nëse mund të ketë pasoja hapja e çështjes së ndryshimit të kufijve edhe për Maqedoninë e Veriut, kryeministri Zoran Zaev tha se “tani ata vetëm mund të ëndërrojnë për ndryshimin e kufijve të Maqedonisë Veriore. Ne jemi anëtar i NATO-s. Nuk do të ketë ndryshim kufijsh në Maqedoninë Veriore. Ne jemi të sigurt dhe (anëtarësia në NATO) na e jep këtë siguri”.

Kryeministri i Maqedonisë së Veriut, Zoran Zaev në bisedë me Deutsche Ëellen theksoi, se “qëllimi ynë i përbashkët është integrimi në BE, në zonën Shengen dhe hapja e kufijve. Të jemi në një kufi të përbashkët evropian, kjo është gjëja më e rëndësishme. Nëse mendojmë në këtë drejtim, duhet të veprojmë në këtë mënyrë. Më në fund duhet të ndalim të mendojmë, se bota ka filluar të ekzistojë me kombet tona. Jo. Ne mund të jemi të gjithë më ambiciozë, të tregojmë më shumë solidaritet, të ndihmojmë më shumë njëri-tjetrin për një jetë më të mirë, ne kemi të gjithë vetëm një jetë. Dhe shumë varet nga politikanët. Nëse e lëmë mënjanë nacionalizmin, do të jemi më evropianë dhe do të jetojmë më shumë një jetë evropiane”.

Fjalë Kryesore:

Të ngjashme