Akil Gjakova flet për emocionet që përjetoi në Grand Slam

Prishtinë | 11 Shk 2018 | 15:20 | Nga

Xhudisti Akil Gjakova dje ka gjunjëzuar kampionin olimpik, Lasha Shavdatuashvilli në Grand Slam-in e Parisit për të shënuar një fitore historike.

Në një intervistë për IJF-në, Gjakova ka zbuluar se çfarë ndjenje është ta mposhtësh kampionin olimpik dhe emocionet që përjetoi në këtë Grand Slam, transmeton Koha.net.

Gjakova, që garon në kategorinë 73 kilogramë, thotë se kjo medalje e motivon edhe për më shumë.

“Është ndjenjë shumë e mirë të fitosh Grand Slamin, kjo është e para për mua dhe është e artë. Jam i lumtur, pata një ditë shumë të mirë, isha në formë shumë të mirë. Mposhta kampionin olimpik dhe kjo është shumë mirë për mua dhe kjo më motivon për më shumë”, është shprehur ai.

I pyetur se çfarë ndjenje është ta mposhtësh kampionin olimpik ai ka thënë se, “është ndjenjë shumë e mirë. Thjesht kam hyrë në meç për të fituar, pata një ndjenjë të mirë dhe një moment të mirë prandaj fitova”.

Me këtë medalje në Grand Slam, Akil Gjakova bëhet xhudisti i parë kosovar që arrin medalje në Grand Slam, një e gjë e tillë thotë se është e rëndësishme për t’i motivuar gjeneratat e reja.

“Po është medalja e parë për meshkujt. Kjo është ndjenjë e mirë pasi gjeneratat e reja mund të motivohen sepse mund të shikojnë xhudistët si në këtë rast dhe të stërvitin më shumë”, është shprehur ai.

Ai më tutje tregoi se ku është dallimi të jetë medalist në Grand Prix dhe në Grand Slam. Muajin e kaluar Gjakova mori medaljen e argjendtë në Grand Prix të Tunizisë.

“Është një dallim i madh. Grand Prix e Grand Slam janë të rëndësishme, por Grand Slami është më i vështirë pasi xhudistët më të mirë janë këtu dhe jam i lumtur që edhe unë jam”, ka deklaruar Gjakova.

Fjalë Kryesore:

Të ngjashme