Arrihet marrëveshja, ylli i Kosovës te gjiganti anglez

Prishtinë | 30 Kor 2018 | 14:55 | Nga

Manchester City ka arritur marrëveshje me Swansea Cityn për shitjen e përfaqësuesit të Kosovës, Bersant Celinën.

Sky Sports mëson se i riu kosovar i Manchester Cityt, do t’i bashkohet Swansea Cityt, që nga ky sezon do të bëjë gara në Championship – nivelin e dytë të futbollit anglez – për rreth 5 milionë euro, transmeton Gazeta Express.

21-vjeçari i Kosovës, i cili ka qenë vetëm katër herë titullar për Cityn, i shënoi shtatë gola në 35 paraqitje në ligë për Ipswichin sezonin e kaluar, ku e kaloi stinorin si i huazuar.

Trajneri i Swansea Cityt, Graham Potter, synon ta rikthejë ekipin e tij në Premierligë dhe prandaj i është vënë pas Celinës, i cili i ka shfaqur aftësitë e tij në Championship sezonin e kaluar.

Tani, sipas Sky, ai ia ka arritur qëllimit ta sjellë Celinën në skuadër.

Ndërkohë, blerja e Riyad Mahrez nga Pep Guardiola ka bërë që shpresat e Celinës për të qëndruar në City të shuhen.

 

Të ngjashme