Ballkani ndalet edhe në Prishtinë

Prishtinë | 12 Qer 2020 | 19:31 | Nga Ekonomia Online

Flamurtari ka ndalë Ballkanin që nuk arriti të marrë më shumë se një pikë në udhëtimin në Prishtinë.

Ndeshja e xhiros së 24-t që u zhvillua në stadiumin e Flamurtarit, përfundoi pa gola. Kjo është ndeshja e dytë rresht kampionale që Ballkani e luan pa gola që nga rifillimi i garave të Superligës së Kosovës në futboll, pas pauzës shkaku i koronavirusit.

Me këtë pikë të fituar, Flamurtari mbetet në pozitën e tetë por me 29 pikë të mbledhura derisa Ballkani renditet i dyti me 46 pikë sa i ka edhe Drita që është lidere dhe luan të dielën kundër Trepçës ’89 në udhëtim. Ballkani i Suharekës javën e kaluar humbi pozitën e parë. Të premten dështoi ta kthej atë.

“E dominuan lojën, patëm raste, por duket se fati po na mungon”, ka thënë Agim Maliqi, trajner te Ballkani.

“Kundërshtari ishte mjaft i rrezikshëm, por luftuam deri në fund dhe merituam pikën, edhe pse Ballkani pati raste të mira shënimi. Na mbetet të punojmë që të përmirësohemi edhe më shumë”, ka thënë trajneri i Flamurtarit, Synaj Keqi.

Të premten është zhvilluar edhe një ndeshje tjetër e kësaj xhiroje, ku Feronikeli fitoi me rezultatin 2:0 në Klinë ndaj Dukagjinit. Golat për ekipin mysafir i realizuan Mevlan Zeka (49’) e Da Silva (88’). Nikli me këtë fitore ka 40 pikë dhe zë vendin e pestë në tabelë. Ndërkohë, Dukagjini mbetet i fundit me dhjetë pikë pas 24 ndeshjeve të luajtura këtë edicion.

Të ngjashme