Sulmuesi brazilian Neymar ka humbur gjyqin me ish-skuadrën e tij Barcelonën.

Neymar e kishte paditur në vitin 2017 Barcelonën duke pretenduar se gjiganti spanjoll i kishte atij borxh 43,6 milionë euro për disa bonuse.

Por kampioni në fuqi i Spanjës ishte kundërpërgjigjur menjëherë, duke e paditur brazilianin.

Barcelona e paditi në gjyq Neymarin për t’i rikthyer mbrapsht 22,5 milionë euro që i mori për rinovimin e kontratës si dhe 8,5 milionë të tjera për prishje të imazhit.

E pas tri viteve nëpër seanca të ndryshme, në fund një gjykatë katalunase i ka dhënë të drejtë klubit.

Kësisoj Neymar e ka humbur betejën me Barcelonën dhe tani detyrohet t’i paguajë 6,7 milionë euro.

Neymar e kishte quar këtë çështje në FIFA, por shtëpia më e madhe e futbollit botëror e la gjithçka në dorë të gjykatës që në fund i dha të drejtë Barcelonës.

Vlen të theksohet se Barcelona vazhdon të insistojë ta rikthejë brazilianin në skuadër, pasi edhe vet Neymar dëshironte rikthimin në Camp Nou.

Por pasi ka humbur betejën me ish-klubin e tij në gjyq, vështirë se Neymar do të pranonte tani rikthimin te Barça.