Barcelona është afër emërimit të Xavi Hernandezit si trajner të ri të skuadrës, pasi të mërkurën i dërgoi drejtuesit e vet në Katar për ta përmbyllur marrëveshjen.

Xavi, i cili është trajner i Al Saddit, mori ofertë nga Barcelona për ta marrë drejtimin e ekipit të parë menjëherë pas shkarkimit të Ronald Koemanit më 27 tetor, raporton Gazeta Express.

Sergi Barjuan u emërua trajner i përkohshëm i ekipit derisa Barça ta përmbyllë marrëveshjen me legjendën e klubit, Xavi.

Emërimi i Xavit tani duket i pashmangshëm, sipas mediave spanjolle.

Zëvendësdrejtori Rafa Yuste dhe drejtori i futbollit Mateu Alemany udhëtuan drejt Dohas të martën mbrëma, menjëherë pas fitores së Barcelonës 1:0 ndaj Dynamo Kyiv.

Drejtuesit e Barçës do të bisedojnë me zyrtarët e Al Saddit për emërimin e Xavit trajner të Barcelonës në një marrëveshje dyvjeçare e gjysmë.

Nëse bisedimet shkojnë mirë, atëherë Xavi do të jetë trajner i ri i Barcelonës deri javën e ardhshme.