Mediumi britanik Sunday Express pretendon se Maurizio Sarri dhe Chelsea janë bashkuar në garën për sulmuesin polak të Genoas, Krzysztof Piatek.

23-vjeçari polak ka shënuar 14 gola në 10 ndeshje në të gjitha garat këtë sezon për klubin dhe kombëtaren e tij.

Ai ka qenë i pandalshëm që kur ka shkuar te Genoa për vetëm 4.5 milion euro dhe paraqitjet e tij të mira ia kanë ngritur çmimin shumë, transmeton Telegrafi.

Mediat italiane raportojnë se çmimi i qendërsulmuesit polak tani është afër 50 milionë euro.

Piatek është lojtari i parë që nga Christian Vieri në Inter në sezonin 2002-03 që arrin të shënojë në secilën prej shtatë ndeshjeve të para në Serie A.

Sipas gazetës angleze, Sarri i ka bërë thirrje Chelseat të shkojë me një ofertë gjatë janarit për Piatekun.

Kjo pasi talenti polak shihet si një zëvendësim ideal për sulmuesin spanjoll Alvaro Morata, i cili nuk po bind me paraqitje.

Megjithatë, ka shumë konkurrencë, sepse Piatek është gjithashtu objektiv i Juventusit, Barcelonës, Interit, Arsenalit, Romës, Bayern Munichut dhe Napolit.