E ardhmja e Coutinhos është në Angli, shtatë skuadra angleze e duan brazilianin

Prishtinë | 13 Qer 2020 | 11:38 | Nga Ekonomia Online

Philippe Coutinho nuk do të mbetet te Bayern Munichu, pasi klubi bavarez nuk ka shfrytëzuar klauzolën për blerjen përfundimtare të tij.

Barcelona e kishte huazuar lojtarin për një vit me Bayernin që kishte të drejtën e blerjes për 120 milionë euro, por një gjë e tillë nuk do të ndodhë.

Duke parë krizën e klubeve për shkak të coronavirusit, por edhe ecurinë jo të mirë të Coutinhos, Bayerni vendosi që mos ta aktivizojë klauzolën për blerjen e brazilianit.

28-vjeçari nuk do të mbetet as te Barcelona, pasi nuk preferohet nga trajneri Quique Setien.

Megjithatë e ardhmja e tij pritet të jetë në kampionatin anglez Ligën Premier, ku kishte kaluar pesë vite të suksesshme te Liverpooli.

Janë plot shtatë skuadra angleze që kanë shprehur interesim për transferimin e brazilianit gjatë verës, por problemi qëndron tek çmimi i tij i lartë prej 80 milionë eurove sa e vlerëson momentalisht Barcelona.

Chelsea, Arsenal dhe Manchester City janë tre gjigantët anglez që duan transferimin e Coutinhos.

Por në garë fuqishëm po qëndrojnë edhe skuadrat tjera si Tottenham Hotspur, Everton, Newcastle United dhe Leicester City.

Barcelona është e vendosur të fitojë së paku 80 milionë nga shitja e brazilianit, por nëse nuk vije ndonjë ofertë me këtë shumë, atëherë katalunasit do të kërkojnë nga skuadrat e interesuara të përfshijnë ndonjë futbollist për shkëmbimin e brazilianit.

Të ngjashme