Nadal kalon në raundin e tretë të Australian Open

Prishtinë | 23 Jan 2020 | 15:44 | Nga Ekonomia Online

Tenisti numër një i botës, Rafael Nadal, e siguroi një vend në rundin e tretë të Australian Open me fitore në tri sete radhazi kundër argjentinasit Federico Delbonis.

Rafael Nadal, i cili po e kërkon titullin e 20-të të Grand Slams, e mposhti 6-3 7-6 (7-4) 6-1 tenistin e radhitur në pozitën e 76-të në ranglistën botërore, Federico Delbonisin.

Tani, në rundin e tretë të turneut Australian Open, spanjolli Nadal do të përballet me bashkëkombësin e tij Pablo Carreno Busta, i cili radhitet i 27-i në botë.

Ndërsa, Dominic Thiem dhe Karen Khachanov siguruan fitore zbavitëse në pesë sete në ditën e katërt të turneut në Melburn, përderisa edhe Nick Kyrgios mori vëmendje me fitoren e tij.

Nadali s’e ka fituar titullin e Australian Open që nga viti 2009, mirëpo ai vjen në turneun e këtij sezoni si tenisti numër një i botës.

Përderisa ai s’e pati të lehtë ta fitonte setin e dytë të ndeshjes kundër Delbonisit, spanjolli pati mundësi ta përfundonte ndeshjen edhe më parë, pasi që i shfrytëzoi vetëm tre nga 20 “break points”.

Gjatë ndeshjes, Nadali e puthi një vajzë në faqe dhe ia dha asaj mbajtësen e tij të flokëve, pasi e goditi aksidentalisht me top.

“Isha shumë i frikësuar për të – topi ishte shumë i shpejtë dhe shkoi drejt e te ajo. Ajo është një vajzë super e guximshme”, tha Nadal. 

Fjalë Kryesore:

Të ngjashme