Sot në Rahovec u përurua palestra më e madhe sportive e cila mban emrin e dëshmorit të rënë gjatë kohës së luftës, Mizahir Isma.

E kjo palestër, kryeministrit të vendit përshtypjen e parë ia dha sikur të ishte në Amerikë e jo në vendin e tij.

“Kur hyna nuk e dita a jam në Amerikë a në Kosovë”, tha Haradinaj, raporton Ekonomia Online.

Ndërsa Ministri i Kulturës, Rinisë dhe Sportit, Kujtim Gashi, tha se buxhetit të Kosovës i gjithë ky investim i cili kishte filluar punën e tij nga viti 2007, i ka kushtuar 3 milion euro.

“Është kënaqësi e veçantë të jem në këtë ceremoni të festimit të palestrës më të bukur në Kosovë e cila buxhetit të MKRS-së i ka kushtuar rreth 3 milion euro. Uroj që nga kjo palestër të mos ketë rezultate vetëm basketbolli por edhe voleybolli e në të gjitha fushat të tjëra”, tha Gashi.

Gashi tha se ky ka qenë një prej projekteve më të mëdha infrastrukturore.

“Ka qenë e veçantë që prej marrjes sime të mandatit si ministër ta përmbyllim një nga projektet më të mëdhë infrastrukturore”.

Ndërsa kryetari i Komunës së Rahovecit, Smajl Latifaj, tha se me këtë palestër, Rahoveci do ta shënojë historinë e fitores dhe sukseseve.

“Rahovec më në fund palestra është gati. Unë ndihem i lumtur që jam këtu ta hap palestrën e sporteve. Sot nuk dua të zgjas fjalimin tim pasi mjaft është stërzgjatur puna e punimeve të kësaj palestre. Që nga sot sporti rahovecas do shkruaj historinë me shumë fitore e suksese. Më duhet të them se pa seriozitetin dhe përkushtimin e dhuruar nga komuna, ministria e Qeveria nuk do kryhej palestra. Përfundimin e kësaj palestre ia kemi pasur borgj sportistëve tanë e qytetarëve”.

 Ndërsa djali i dëshmorit Mizahir Isma, Jetullah Isma tha se nëse babai i tij do ishte gjallë do ishte krenar për këtë vepër.

“Jam i lumtur që sot ndodhem në mesim tuaj. Unë ju them se edhe babai im do ishte krenar me ndërtimin e këtij objekti. Babai im ka luftuar për liri dhe në mbrojtje të shokëve dhe vendit të tij. Kjo palestër e cila ka marrë emrin e babait tim do jetë një mburrje për ne”.