Presidenti i Barçës: Neymari donte të kthehej në Barcelonë

Prishtinë | 07 Sht 2021 | 12:04 | Nga Ekonomia Online

Presidenti i Barcelonës Joan Laporta e ka pranuar se klubi kishte bërë përpjekje për ta kthyer Neymarin në Camp Nou, kur ai e rimori postin e të parit të klubit katalonas, pasi braziliani e kishte shprehur dëshirën të kthehej.

Për kthimin e Neymarin në Barcelonë është folur qysh prej kohës kur ai iu bashkua Paris Saint-Germainit për 222 milionë euro, rekord botëror, në vitin 2017, raporton Gazeta Express.

Thuhej se Neymari ishte i etur për t’u ribashkuar me Lionel Messin – gjë që ka ndodhur tani në Francë – dhe Barça e kishte lënë të hapur derën për kthimin e tij.

Por Neymar nënshkroi marrëveshje të re me PSG-në dhe kthimi në Barçë dështoi.

Laporta, i cili u votua si president i Barcelonës për herë të dytë në mars, tha për Esport3 kur u pyet nëse ka tentuar ta kthejë Neymarin në Barcelonë: “Po, ne tentuam të nënshkruajmë me Neymarin përsëri”.

“Ai na kontaktoi dhe donte të vinte”, tregoi Laporta.

Neymari e nënshkroi marrëveshjen e re me PSG-në në maj, e cila do ta mbajë atë në kryeqytetin francez deri në verën e vitit 2025.

Fjalë Kryesore:

Të ngjashme