Përfaqësuesja e Kosovës gjatë ditës së sotme ka arritur në Austri.

Dardanët nesër zhvillojnë ndeshjen miqësore ndaj Maltës, me fillim nga ora 18:00.

Në një konferencë për shtyp para duelit ka folur mesfushori fantastik i Kosovës, Herolind Shala.

Futbollisti që luan në Norvegji te skuadra Stabaek, ka treguar sa e vështirë ka qenë kjo periudhë në shtetin skandinav për futbollistët.

“Jemi gjithmonë në dilemë a me ardhur apo mos me ardhur me luajtur për shkak të masave në Norvegji. Por kësaj radhe qeveria na ka lejuar me ardhur me luajtur dhe normalisht për mua është ndjenjë e jashtëzakonshme”, tha Shala.

Tutje ai foli edhe për mungesën e tifozëve te Kosova, të cilët i japin përkrahje të madhe dardanëve.

“Ne jemi shumë të fokusuar, edhe pse është shumë vështirë pa shikuesit tonë të cilët gjithmonë na mbështesin dhe gjithmonë janë mbrapa neve, mirëpo ne do të japim gjithçka me arritur rezultate pozitive dhe me dërgu Kosovën përpara”, përfundoi Herolind Shala.

Kujtojmë se Kosova fitoi ndeshjen e parë miqësore të qershorit ndaj San Marinos, me rezultat 4-1.

Shala nuk ka luajtur në ndeshjen e parë ndaj San Marinos, pasi ai u bashkua me Dardanët vetëm të hënën në mesditë.