Sipas Tuttosport, PSG mund të zëvendësojë Kylian Mbappen me Cristiano Ronaldon nëse sulmuesi i Francës kalon në Real Madrid.

Zinedine Zidane refuzoi të përjashtojë një lëvizje për yllin e skuadrës franceze: “Ne e njohim njëri-tjetrin shumë mirë. Por, ai nuk është lojtari im, dhe unë nuk mund të flas për të. Ne do të shohim se çfarë ai dëshiron të bëjë në të ardhmen”, ka thënë trajneri francez në një konferencë shtypi.

Mbappes kontrata i skadon në qershor të vitit 2022 dhe nuk ka arritur një marrëveshje për të zgjatur qëndrimin e tij në klub.

Sipas Tuttosport, Cristiano Ronaldo mund të zëvendësojë atë, nëse fituesi i Kupës së Botës ndahet me gjigantët e Ligue 1 në verë.

Portugezi po jeton një situatë të ngjashme pasi i ka mbetur edhe një vit në kontratën e tij me Zonjën e Vjetër, e cila mund ta shesë atë për 29 milionë euro.

Sidoqoftë, sipas gazetës me bazë në Torino, ylli portugez nuk është i gatshëm të largohet nga Torino për momentin, dhe Juventus nuk po konsideron shitjen e tij. CR7 së shpejti do të takojë drejtuesit e klubit për të diskutuar të ardhmen e tij dhe një vendim përfundimtar varet vetëm nga ai.

Ronaldo mund të bashkohet me PSG në një marrëveshje shkëmbimi me Mauro Icardin, edhe nëse raportime të ndryshme në Itali sugjerojnë që ish-kapiteni i Interit mund të përfshihet në një marrëveshje shkëmbimi me Paulo Dybalan.