Unioni i Federatave Evropiane të Futbollit (UEFA) ka dhënë dritën e gjelbër stadiumit “Fadil Vokrri” duke konfirmuar se ky i fundit është i gatshëm që të përdoret për zhvillimin e ndeshjeve ndërkombëtare.

Këtë e ka bërë të ditur ministri i Kulturës, Rinisë dhe Sportit, Kujtim Gashi përmes një postimi në rrjetin social Facebook.

Më poshtë gjeni postimin e plotë të Gashit:

Sot pranuam konfirmimin nga Unioni i Federatave Evropiane të Futbollit (UEFA) se stadiumi “Fadil Vokrri” mund të përdoret për zhvillimin e ndeshjeve ndërkombëtare. Konkretisht, UEFA ka lejuar përdorimin e stadiumin për ndeshjet e UEFA Nations League, ku Kosova do të zhvillojë ndeshjen kundër Ishujve Faroe më 10 shtator 2018.

Me këtë rast uroj tërë komunitetin futbollistik në Kosovës, duke filluar nga Federata e Futbollit të Kosovës, klubet, futbollistët e punëtorët sportiv.

Ne si ministri dhe unë si ministër personalisht, në vazhdimësi dhe me angazhimin të madh kemi punuar që të vijmë deri tek kjo ditë kur zyrtarisht të na lejohet që të zhvillojmë ndeshje ndërkombëtare në stadiumet përbrenda territorit të Republikës së Kosovës.

Njoftoj komunitetin sportiv në përgjithësi dhe atë të futbollit në veçanti se UEFA na e ka dërguar konfirmimin që lejon përdorimin e stadiumit ‘Fadil Vokrri’ për zhvillimin e ndeshjeve ndërkombëtare në kuadër të Ligës së Kombeve në kuadër të UEFA-së, dhe më 10 shtator Kosova do të shënojë një fakt historik sepse për herë të parë luan në një stadium të pranuar ndërkombëtarisht në territorin e vet dhe nuk ka nevojë të shfrytëzojë arenat sportive të vendeve tjera.

Dua t’i uroj të gjithë ata që kanë kontribuar që për punën që stadiumi ka ardhur deri në këtë fazë. Po ashtu i uroj dhe u dëshiroj suksese edhe futbollistëve që do ta shfrytëzojnë këtë stadium modern në të cilin kemi investuar dhe jemi angazhuar maksimalisht për të. Urime??! KG