Reprezentuesi i Kosovës, Idriz Voca, është mesfushori defensiv më i shtrenjtë në futbollin zviceran, ka shkruar të premten e përditshmja “Blick”.

22-vjeçari, i cili është pjesë e skuadrës së Luzernit, ka vlerë prej tre milionë eurosh, e cila e bën lojtarin më të shtrenjtë në rolin e tij në Zvicër.

Voca ka debutuar me ekipin e parë në edicionin 2017/18 dhe shpejt ka arritur të bëhet lojtar kyç. Ai deri më tani ka regjistruar 52 ndeshje në Superligën e Zvicrës, duke shënuar një gol dhe asistuar katër të tjerë.

“Personalisht, nuk iu kushtoj rëndësi detajeve të tilla, pasi vetëm dua të luaj futboll. E rëndësishme është për mua që të kem paraqitje të mira dhe të mos merrem me vlerën time”, është shprehur Voca, që ka kontratë me Luzernin deri në vitin 2021.