Xhaka: Do të mendoj dy herë, nëse më ofrohet shiriti i kapitenit përsëri

Prishtinë | 24 Shk 2020 | 14:38 | Nga Ekonomia Online

Granit Xhaka ka zbuluar se koha kur Arsenali vendosi t’ia marrë shiritin e kapitenit të skuadrës ka qenë periudha më e vështirë në karrierën e tij dhe se kishte pasur frikë se nuk do të luante kurrë më për klubin londinez. Mesfushori shqiptar thotë se do të mendojë dy herë, nëse i ofrohet mundësia për t’u bërë kapiten përsëri.

Në nëntor trajneri i atëhershëm Unai Emery ia hoqi shiritin e kapitenit mesfushorit të Kombëtares së Zvicrës me prejardhje nga Kosova, për shkak të një zënke që Xhaka e kishte pasur me tifozët gjatë barazimit të Arsenalit 2:2 me Crystal Palace në Emirates më 27 tetor, transmeton Gazeta Express.

Tifozët e Arsenalit e fishkëllyen Xhakën në momentin kur u zëvendësua, duke e nxitur atë të reagojë ndaj tyre duke i sharë në gjuhën angleze. Më vonë, familja e Xhakës u abuzua online nga tifozët e klubit.

Tani, me ardhjen e Mikel Artetas në postin e trajnerit të klubit, Xhaka është titullar i rregullt, por i pyetur nga mediat angleze nëse kishte menduar se loja ndaj Palace ishte e fundit në karrierën e tij për Arsenalin, ai tha: “Natyrisht, nuk mund t’ju gënjej. E mendova në atë moment, sepse nuk ka qenë e lehtë për mua dhe familjen time. Shpresoj se njerëzit më kuptojnë”.

“Por mendoj se tregova karakter. Unë nuk jam person që ik. Gjithmonë i them klubit: ‘Përderisa të jem këtu, do të jap gjithçka nga vetja’. Gjithmonë ka qenë kështu”, shtoi ai.

Është e qartë se humbja e shiritit të kapitenit ka qenë e dhimbshme për Xhakën, i cili u bë qendër e kritikave nga tifozët në ditët e fundit të Emeryt në klub. Që prej atëherë, mesfushori shqiptar e ka veshur shiritin e kapitenit përkohësisht, për koincidencë kundër Palace, kur iu dha ai në minutat e fundit gjatë barazimit 1:1 në Selhurst Park.

Por Xhaka e pranon se ka ngurruar ta pranojë atë atëherë dhe thotë se ende ka rezerva për t’u bërë kapiten në të ardhmen, nëse i kërkohet.

“Unë e di çfarë mund t’i ofroj këtij ekipi me apo pa shiritin e kapitenit. Nuk desha ta pranoj shiritin e kapitenit kundër Palace, por Sokratis dhe David Luiz më thanë se duhej ta pranoja. Nëse një ditë klubi më kërkon të bëhem kapiten, do të mendoj dy herë”, këmbënguli Xhaka.

Fjalë Kryesore:

Të ngjashme