Zbulohet oferta e Mallorcas për Muriqin

Prishtinë | 30 Maj 2022 | 13:02 | Nga Ekonomia Online

Vedat Muriqi e pati një eksperiencë pozitive në La Liga.

Sulmuesi kosovar i realizoi 5 gola dhe i bëri 3 asistime gjatë pesë muajve sa qëndroi në Mallorca.

Ai e ndihmoi ekipin spanjoll të mbetet në ligën elitare spanjolle dhe gjatë kësaj periudhë hyri në zemrat e tifozëve të këtij klubi.

Ata madje i kërkuan atij edhe publikisht të qëndrojë në ekipin ishullor, shkruan “Gazeta Express”.

Momentalisht, 28 vjeçari është rikthyer në Lazio pasi i përfundoi huazimi në Mallorca.

Por, klubi italian nuk e ka ndërmend ta mbajë lojtarin, i cili e kishte një eksperiencë dëshpëruese prej një viti e gjysmë në kryeqytetin italian.

Lazio e kishte vendosur çmimin e Muriqit prej 12 milionë eurosh.

Por, Mallorca kërkon ta blejë më lirë lojtarin.

Klubi spanjoll është i gatshëm t’i paguajë 10 milionë euro për kartonin e prizrenasit, shkruajnë mediat italiane, përcjell “Gazeta Express”.

Lazio e kishte blerë Muriqin për afro 20 milionë euro nga Fenerbahçe, ndërsa nuk është e gatshme ta japë atë për një shumë më të ulët se 10 milionë euro.

Gjithashtu, interesim për Muriqin, i cili aktualisht është i grumbulluar me Kombëtaren e Kosovës, ka shfaqur edhe ish-klubi i tij, Fenerbahçe dhe gjiganti tjetër nga Stambolli, Galatasaray. 

Të ngjashme