Ming-Chi Kuo, analisti i njohur i ekosistemit Apple, e ka publikuar raportin e tij më të ri për investitorë, i cili jep një pasqyrë të situatës në Apple pas tarifave më të reja të cilat ia ka vendosur administrata amerikane Kinës. Sipas Kuo, Apple është i përgatitur t’i absorbojë kostot shtesë dhe tarifat e vendosura nuk do të çojnë në rritje të çmimeve të produkteve të Apple, të paktën në një afat të shkurtër, raporton GSMArena.

Përveç kësaj, Kuo beson se Apple do të punojë për ta përmirësuar prodhimin e vet jashtë Kinës në mënyrë që t’i përmbushë kërkesat e tregut dhe kështu t’i shmangë tarifat shtesë krejtësisht.

Raporti i ri vjen vetëm disa ditë pasi që presidenti amerikan Donald Trump e ka vendosur një tarifë prej 10% në mallrat e importuara kineze, në një vlerë prej 300 miliardë dollarësh, shkruan KOHA Ditore. Si rezultat i këtij vendimi, aksionet e Apple kanë rënë për dy përqind. Apple ka theksuar më herët se kjo lloj tarife mund të ndikojë në çmimet e të gjitha produkteve të ardhshme të kompanisë.

Sipas Ming-Chi Kuo, prodhimi i automatizuar dhe i avancuar i Apple, i kombinuar me pjesën shtesë të tregut të kompanisë në SHBA, mund t’ia sigurojë kompanisë që të mos i rritë çmimet dhe të mbetet stabile në treg.