Arsene Wenger beson se Arsenali mund ta fitojë titullin në Premierligë nën udhëheqjen e trajnerit Mikel Arteta dhe e pranon se është i befasuar me nivelin e investimeve në skuadër në sezonet e fundit.

Arsenali e nisi sezonin e ri në ligë duke i fituar nëntë nga 12 pikët e mundshme dhe renditet i katërti – vetëm tri pikë prapa liderit befasues, Everton.

Skuadra e Artetës do të përballet me Manchester City të shtunën dhe Wenger beson se trajneri spanjoll ka mjaft cilësi në skuadrën e vet për t’i dhënë fund pritjes 16-vjeçare për titull.

“Sinqerisht besoj se po, sepse duket se ai e ka futur në dorë ekipin shumë mirë. Ata (lojtarët) e kuptojnë atë shumë mirë”, tha Wenger.

“Kemi blerë lojtarë të mirë, kemi shpenzuar shumë para në dy sezonet e fundit. Papritmas ne zbuluam shumë të hyra, kjo ishte goxha befasi”, shtoi ai.

“Mendoj se ai ka lojtarë cilësorë dhe të mjaftueshëm (për ta fituar titullin). Mund ta fitojmë, pse jo?”