Deputetët e Kuvendit të Kosovës kanë votuar kundër amendamenteve që ua rriste pagën profesionistëve shëndetësor, policëve dhe inspektorëve.

Fillimisht deputeti i PDK-së, Bekim Haxhiu tha se amandamenti 64 është në vazhdën e luftës antikovid, konkretisht ngritjen e pagës për policët, andaj kërkoi nga deputetët që të votojnë pro këtij.

“Edhe pse nuk e dhatë për mjekët, po jepeni për policinë se ndoshta iu dënojnë pak dhe jepeni votën pro se policët dhe mjekët po punojnë e hanë byrek, ne biftek e nuk kanë as t’i ushqejnë fëmijët e vet, e vlerësojeni se si do të kemi mundësi ta luftojmë pandeminë”, tha ai.

Në fund ky amendament nuk kaloi, pasi morri vetëm 24 vota për.

Ndërkohë, pikërisht deputeti i Partisë Demokratike të Kosovës, Bekim Haxhiu, ka bërë publike propozimet e tij të cilat i ka dhënë në kuadër të amendamenteve për plotësim-ndryshimin e Ligjit për buxhetin e vitit 2020.

Në një intervistë për Ekonomia Online, Haxhiu ka thënë se në këto propozime përfshijnë rritjen e pagave për profesionistët shëndetësor, policët dhe kategoritë tjera që janë duke u përballur me pandeminë Covid-19.