Nëse ndiheni gjithmonë të plogësht dhe të përgjumur, provoni këto këshilla për të larguar njëherë e përgjithmonë lodhjen e dimrit. Nëse gjëja më e mirë në botë në këtë periudhë të vitit është të qëndroni nën batanije në shtëpi me një filxhan kakao të nxehtë dhe një libër ose film të mirë, atëherë mund të vuani nga lodhja e dimrit.

Ka arsye të ndryshme pse mund të ndiheni të lodhur në dimër dhe për fat të mirë, ka edhe veprime të ndryshme që mund të bëni për të minimizuar këtë. Shpesh është rezultat i orëve të pakta të ditës, të cilat në mënyrë të pandërgjegjshme mund t’i dërgojnë sinjalin trurit se është koha për të filluar përgatitjen për shtrat edhe pse mund të jetë ende mesditë.

Me ditët më të shkurtra dhe mungesën e dritës së ditës, cikli natyral i gjumit-zgjimit të trupit tuaj del jashtë ekuilibrit. Kjo ndodh sepse ritmi cirkadian, ora e brendshme e trupit, ndikohet lehtësisht nga rrezet e diellit dhe temperatura. Një ndryshim i papritur në këto dy sinjale të jashtme mund të prishë ndjeshëm ritmin cirkadian dhe lirimin e melatoninës, hormonit përgjegjës për aktivizimin e gjumit. Si rezultat, më shumë melatonin prodhohet sapo errësira fillon të shfaqet jashtë dritares.

Lodhja e dimrit mund të lidhet gjithashtu me kushte të tjera shëndetësore, duke përfshirë çrregullimin emocional sezonal (SAD) dhe mungesën e vitaminës

Si të mposhtim ‘lodhjen e dimrit’? Lodhja e dimrit mund të çojë në shqetësime të mëdha, madje duke penguar aftësinë e dikujt për të bërë gjërat më të thjeshta të përditshme. Më poshtë janë disa këshilla që mund t’ju ndihmojnë të mposhtni ‘lodhjen e dimrit’.

Përmirësoni cilësinë e gjumit tuaj

Gjumi është kritik për shëndetin fizik dhe mendor, si dhe për funksionimin tuaj të përditshëm. Duke fjetur keq, jeni më të prirur ndaj problemeve të humorit dhe përqendrimit, si dhe problemeve shëndetësore. Pra, nuk është befasi që përmirësimi i rutinës tuaj të gjumit ndihmon në reduktimin e simptomave të ‘lodhjes së dimrit’.

Por kujdes, sipas ekspertëve, çelësi është cilësia e gjumit, jo sasia. Për të arritur këtë qëllim, njeriu duhet “të shkojë në shtrat dhe të ngrihet në të njëjtën orë çdo ditë, edhe nëse është e vështirë për të fjetur”, sepse “kjo rutinë ndihmon për të vendosur orën biologjike dhe për të përmirësuar cilësinë e gjumit”.

Merrni pak kohë për t’u çlodhur

Jeta e përditshme mund të jetë stresuese, por është e rëndësishme të gjeni kohë për t’u çlodhur, ndoshta duke provuar joga, ushtrime të frymëmarrjes ose meditim ose thjesht duke bërë një shëtitje duke dëgjuar podcast-in tënd të preferuar ose duke parë serialet më të fundit të nxehta në Netflix.

Bëni aktivitet fizik të rregullt

Rrotullimi nga shtrati ose divani për të shkuar në palestër mund të jetë gjëja e fundit që dëshironi të bëni këto ditë, por të qëndroni aktiv dhe të bëni ushtrime të rregullta ndihmon që gjaku të pompohet dhe të zgjoheni. Ekspertët rekomandojnë që të rriturit të bëjnë të paktën 150 minuta stërvitje në javë. Por nëse nuk doni të dilni nga shtëpia, bëni ushtrime në dhomën e ndenjes. E rëndësishme është të qëndroni aktiv.

Hani ushqim me vlera ushqyese

Ushqimi është thelbësor për mirëqenien, aq më tepër në këtë periudhë të vitit. Në fakt, ushqimi ndikon në nivelet e energjisë dhe ngrënia e ushqimeve me vlera ushqyese, veçanërisht gjatë muajve të ftohtë, mund të ndihmojë në mposhtjen e ‘lodhjes së dimrit’. Ngrënia e më shumë frutave dhe perimeve do të ndihmojë në mbajtjen e niveleve të energjisë gjatë gjithë ditës dhe do të forcojë sistemin tuaj imunitar për të shmangur ftohjet dhe gripin e dimrit.

Ekspozoni veten sa më shumë në rrezet e diellit

Gjatë dimrit, ditët bëhen më të shkurtra dhe ka më pak dritë në dispozicion. Kjo do të thotë, për shembull, që nëse keni një punë që përfundon në pesë të mbrëmjes, do të jetë tashmë errësirë ​​kur të dilni nga zyra. Prandaj është thelbësore që të ekspozoni veten ndaj dritës natyrale sa më shumë që të jetë e mundur gjatë ditës pasi ajo ndikon në ciklin gjumë-zgjim. Hapni sa më shumë perdet dhe blindat, qëndroni para dritares gjatë pushimit të drekës ose dilni për shëtitje.