Qendra Kosovare për Studime të Sigurisë (QKSS) në bashkëpunim me Qendrën e Beogradit për Politika të Sigurisë (BCSP) kanë organizuar konferencën “Faza përfundimtare: Rifillimi i Dialogut Kosovë-Serbi”, ku u publikuan gjetjet e raportit Barometrit Kosovar të Sigurisë – Edicioni special mbi Dialogun Kosovë-Serbisë, raporton Ekonomia Online. 

Aty u tha se korrupsioni perceptohet si rreziku më i lartë ndaj sigurisë kombëtare të Kosovës. Papunësia renditet në vendin e dytë, ndërkaq krimi i organizuar renditet në vendin e tretë ndër rreziqet ndaj sigurisë kombëtare.

Plator Avdiu hulumtues në QKSS, tha se në bazë të hulumtimit, del se korrupsioni, papunësia dhe Serbia janë rrezikuesit më të mëdhenj në Kosovë.

Sipas tij, 80 për qind e shqiptarëve mendojmë se Kosova rrezikon ndarjen territoriale.

“Qytetarët janë pyetur me atë se çfarë e kërcënon sigurinë kombëtare. Korrupsioni, papunësia dhe Serbia janë rrezikuesit më të mëdhenj të sigurisë kombëtare sipas të anketuarve”.

“Qytetarët ende mendojnë se ndarja e Kosovës dhe asociacioni janë ndër rrezikuarit tjerë të sigurisë kombëtare. 80 për qind e shqiptarëve ende mendojmë se Kosova rrezikon ndarjen territoriale. Rrezik tjetër sipas qytetarëve është edhe asociacioni i komunave serbe”, tha ai.

Sa i përket taksës ndaj produkteve serbe dhe boshnjake të anketuarit kanë qëndrime të ndryshme. Disa prej tyre mendojnë se duhet të hiqet, e disa prej tyre kërkojnë të mbetet në fuqi taksa.

“35 për qind e tyre mendojnë se taksa duhet të mbesë në fuqi, ndërsa 33 për qind e të anketuarve mendojnë se taksa duhet të zëvendësohet me reciprocitet të plotë ndaj Serbisë. Ndërkaq pjesa tjetër mendojnë se tarifat duhet të hiqen në tërësi”, tha Avdiu.

Sa i përket dialogut, Avdiu tha se mbi 50 për qind e të anketuarve mendojnë se dialogu duhet të rifillojë.

Ai tha se kishte të anketuar që mendojnë se dialogu duhet të kushtëzohet me njohje reciproke.

Deputetja e Lëvizja Vetëvendosje, Fitore Pacolli, ka thënë se duke parë rreziqet në Kosovë siç janë korrupsioni dhe papunësia, fitorja e VV-së nuk ishte e rastësishme.

“Nëse fillojmë me prezantimin e raportit e shohim se shumica e të anketuarve mendojnë se rreziku potencial është korrupsioni dhe papunësia. Qytetarët e kanë këtë perceptim sepse e përjetojnë çdo ditë në punë në shkollë, çdo ditë të jetës së tyre”.