Shtetet e Bashkuara kanë ndërmarrë një tjetër aksion spektakolar në Detin Karaibe, duke sekuestruar një tanker nafte të lidhur me eksportet e ndaluara të Venezuelës. Zyrtarë amerikanë konfirmuan se forcat detare të SHBA-së kanë marrë nën kontroll anijen Olina, e cila dyshohet se ishte pjesë e të ashtuquajturës “flotë fantazmë” që përdoret për të shmangur sanksionet ndërkombëtare ndaj naftës venezueliane.

Komanda Jugore e SHBA-ve deklaroi se operacioni u zhvillua nga marinsat dhe marinarët amerikanë në bashkëpunim me Departamentin e Sigurisë Kombëtare, duke dërguar një mesazh të qartë se nuk ka strehë të sigurt për shkelësit e ligjit. Pamje të publikuara në rrjetet sociale tregojnë forcat speciale duke zbritur nga helikopterët direkt në bordin e anijes, në një ndërhyrje të shpejtë dhe të koordinuar.

Sekretarja e Sigurisë Kombëtare, Kristi Noem, e përshkroi Olinën si një tjetër anije të flotës së errët, e dyshuar për transportimin e naftës nën embargo. Sipas saj, tankeri ishte nisur nga Venezuela dhe po përpiqej të shmangte monitorimin amerikan, ndërsa ndodhet në listat e sanksioneve të disa shteteve. Ajo theksoi se ky veprim është pjesë e një strategjie më të gjerë për të frenuar rrjetet ilegale, që përfitojnë nga tregtia e ndaluar e naftës.

Kjo është anija e pestë që SHBA-të kanë sekuestruar në javët e fundit, duke treguar një përshkallëzim të dukshëm të operacioneve detare amerikane në rajon. Sipas kompanisë së sigurisë detare Vanguard Tech, Olina po tentonte të çante bllokadën detare amerikane në Karaibe dhe kishte fikur pajisjet e gjurmimit, një taktikë e zakonshme për anijet që operojnë në mënyrë të paligjshme. Sinjali i saj i fundit ishte regjistruar më shumë se 50 ditë më parë, në verilindje të Curaçaos.

Ekspertët e sigurisë detare theksojnë se këto operacione tregojnë vendosmërinë e SHBA-ve për të kontrolluar rrugët e naftës venezueliane dhe për të goditur rrjetet që tentojnë të anashkalojnë sanksionet ekonomike. Ndërkohë, tensionet në rajon pritet të rriten, pasi Uashingtoni sinjalizon se do të vazhdojë me kontrolle dhe sekuestrime të tjera, duke e kthyer Detin Karaibe në një pikë kyçe të përplasjes gjeopolitike për energjinë dhe sigurinë ndërkombëtare.