Dy shtetas shqiptarë kanë përfunduar në pranga në qytetin e Teramos, në Itali. Ata dyshohen se kishin kthyer një parking në zonën Villa Zaccheo–Petriccione në një pikë të qëndrueshme shitjeje të kokainës. Operacioni për kapjen e tyre u zhvillua pasditen e djeshme, pas një hetimi të nisur mbi bazën e disa sinjalizimeve anonime për lëvizje të dyshimta në këtë zonë.

Sipas policisë italiane, të arrestuarit, 23 dhe 34 vjeç, u kapën në flagrancë në momentin kur po kryenin një transaksion droge. Ata u ndaluan teksa po shkëmbenin pesë doza kokaine me një person tjetër. Qëndrimi i tyre i izoluar në parking dhe sjellja e çuditshme e kishin tërhequr vëmendjen e forcave të rendit.

Gjatë kontrollit të mjetit, policia gjeti edhe pesë doza të tjera kokaine, ndërsa në banesën ku qëndronin dy shqiptarët u sekuestruan materiale të përdorura për paketimin e lëndëve narkotike. Në kuadër të operacionit u sekuestruan gjithashtu 1 450 euro, të dyshuara si përfitime nga shitja e drogës.