Kryetari i Mitrovicës së Jugut, Faton Peci ka nderuar viktimat e 13 marsit, në përvjetorin e 27-të të Masakrës në Tregun e Mitrovicës.

Në një postim në Facebook, Peci tha se ky ishte një akt kriminal, terrorist e gjenocidial, i planifikuar e i porositur nga regjimi i Millosheviqit në Beograd, e që siç thotë ai, ishte projektuar të shkaktonte humbjen e shumë jetrave, me destinacion një vend ku ka turmë njerëzish, transmeton Klankosova.tv.

“Përvjetori i 27 i Masakrës në Tregun e Mitrovicës. Ishte ditë pazari dhe tregu i qytetit i mbushur përplot gjallëri, blerës e shitës, fëmijë, gra, burra, pleq e të rinj, kur pamëshirshëm gjallërinë e jetës e shuajti granata e vdekjes. Në mesin e 7 të vrarëve në Masakrën e Tregut ishin nga më e reja Elizabeta Hasani, 5-vjeçare, deri tek më i vjetri Rrahim Peci, 65 vjeç. Të plagosur mbetën 128, shumë prej tyre ende me plagë. Sot, në shenjë nderimi, bëjmë homazhe pranë pllakës së të vrarëve dhe bashkëndjejmë dhimbjen e të gjallëve të prekur nga ky sulm kriminal”, ka shkruar Peci.