Deputeti i Lidhjes Demokratike, Avdullah Hoti, ka reaguar ndaj vendimit të fundit të Qeverisë së Kosovës për të lejuar regjistrimin e fakteve civile përmes dokumenteve të lëshuara nga strukturat ilegale serbe.

Hoti e ka akuzuar kryeministrin Albin Kurti se ka devijuar nga qëllimi kryesor i dialogut – njohja reciproke – për të përfunduar në kompromise teknike që, sipas tij, legjitimojnë dhe normalizojnë strukturat paralele në Kosovë.

Postimi i plotë:

Në fillim të mandatit në vitin 2021, Kurti e braktisi dialogun për njohje reciproke dhe marrëveshje gjithëpërfshirëse përfundimtare ligjërisht të obligueshme. Në atë kohë ishte krijuar dakordim i përgjithshëm me aleatët se dialogu duhet të zhvillohej vetëm për marrëveshje përfundimtare, në të cilën do të adresoheshin të gjitha çështjet e mbetura në dialogun teknik duke marrë për bazë normat dhe standardet ndërkombëtare të normalizimit të bashkëpunimit ndërshtetëror. Në vazhdimësi, liderët evropianë dhe ata amerikanë e theksonin mbështetjen për një marrëveshje të tillë.

Tash, pas disa vitesh sanksionesh nga BE-ja dhe kritikash nga aleatët e tjerë, Kurti detyrohet të merret me normalizimin e funksionimit të strukturave paralele.

Kosova sigurisht se duhet të jetë e gatshme për dialog me fqinjin verior, gjithmonë me ndërmjetësimin e aleatëve. Por askush nuk ka të drejtë të pranojë zgjidhje, edhe pse mund të duken teknike, që normalizojnë funksionimin e strukturave paralele. Nuk duhet të pranohet vendosja e një ‘status quo’-je.